ក្រុមមន្ត្រីរបស់រដ្ឋ California បានប្ដេជ្ញាថានឹងចាប់ផ្តើមចាត់វិធានការផ្លូវច្បាប់ប្រឆាំងតបតនឹងប្រធានាធិបតីអាមេរិក លោក Donald Trump កាលពីថ្ងៃចន្ទ (០៩ មិថុនា) នៅក្នុងកិច្ចខិតខំប្រឹងប្រែងដើម្បីដកបទបញ្ជានៃការដាក់ពង្រាយឆ្មាំជាតិរបស់រដ្ឋបាល ដោយអះអាងថា ប្រធានាធិបតីរូបនេះបានរំលោភលើអធិបតេយ្យភាពរបស់រដ្ឋ។

អភិបាលរដ្ឋ California លោក Gavin Newsom បានហៅវត្តមានរបស់កងទ័ពនៅតាមដងផ្លូវនៃទីក្រុង Los Angeles ថាជារឿង “ខុសច្បាប់ និងអសីលធម៌”។ មន្ត្រីអាមេរិកបានរាយការណ៍ថា សមាជិកឆ្មាំជាតិប្រហែល ១.០០០នាក់ មានវត្តមាននៅក្នុងទីក្រុងនេះ ក្រោមបញ្ជារបស់សហព័ន្ធ ត្រឹមពាក់កណ្តាលថ្ងៃចន្ទ រួមនឹងកងម៉ារីនរាប់រយនាក់ ដើម្បីដោះស្រាយបាតុកម្មអន្តោប្រវេសន៍ដ៏តានតឹង។

សមាជិកឆ្មាំជាតិ ១.០០០នាក់ ផ្សេងទៀតត្រូវបានរំពឹងថានឹងមានវត្តមានផងដែរ ដោយសាររដ្ឋបាល Trump បានអនុញ្ញាតឱ្យដាក់ពង្រាយសមាជិកសរុប ២.០០០នាក់។ លោក Newsom ដែលជាអភិបាលរដ្ឋមកពីបក្សប្រជាធិបតេយ្យ នៅក្នុងការប្រកាសលើវេទិកាប្រព័ន្ធផ្សព្វផ្សាយសង្គម X បានទាមទារឱ្យ "ដកបទបញ្ជា" ដាក់ពង្រាយកម្លាំងនេះជាបន្ទាន់។

សកម្មភាពនេះហាក់ដូចជាលើកដំបូងហើយក្នុងរយៈពេលជាច្រើនទសវត្សរ៍ ដែលឆ្មាំជាតិរបស់រដ្ឋ ត្រូវបានដាក់ដំណើរការដោយពុំមានការស្នើពីអភិបាលរដ្ឋរបស់ខ្លួន។ ថ្លែងទៅកាន់ប្រព័ន្ធផ្សព្វផ្សាយក្នុងស្រុក លោក Newsom បាននិយាយថា រដ្ឋ California របស់លោកនឹងប្តឹងរដ្ឋបាលលោក Trump ឱ្យលុបចោលការដាក់ពង្រាយឆ្មាំជាតិដ៏ចម្រូងចម្រាសនេះ៕