ក្រុមការងារដែលត្រូវបានឃុំខ្លួនរបស់នាវាដឹកជំនួយទៅកាន់តំបន់ហ្កាហ្សា ក្រោយត្រូវបានស្ទាក់ចាប់ដោយអ៊ីស្រាអែលកាលពីព្រឹកថ្ងៃចន្ទដើមសប្ដាហ៍នេះ បានចូលចតនៅកំពង់ផែ Ashdod របស់អ៊ីស្រាអែលកាលពីល្ងាចថ្ងៃចន្ទដើមសប្ដាហ៍នេះ នេះបើយោងតាមក្រសួងការបរទេសរបស់អ៊ីស្រាអែល។

ក្រសួងការបរទេសខាងលើបាននិយាយថា អ្នកនៅលើនាវាដឹកជំនួយឈ្មោះ Madleen រួមទាំងលោកស្រី Greta Thunberg សកម្មជនអាកាសធាតុរបស់ប្រទេសស៊ុយអែត និងសកម្មជនល្បីៗ ផ្សេងទៀត បានទទួលការពិនិត្យសុខភាពកាលពីល្ងាចថ្ងៃចន្ទ។

នៅពេលទៅដល់កំពង់ផែ Ashdod ក្រុមសកម្មជន ត្រូវបានគេនាំទៅបន្ទប់មួយដើម្បីដាក់បញ្ចាំងសកម្មភាពភ័យរន្ធត់ដែលកត់ត្រាការសម្លាប់រង្គាលថ្ងៃទី៧ ខែតុលាឆ្នាំ២០២៣ធ្វើឡើងដោយក្រុមហាម៉ាស នេះបើយោងតាមរដ្ឋមន្ត្រីការពារជាតិអ៊ីស្រាអែលលោក Israel Katz ។

លោក Katz បានអះអាងថា នៅពេលពួកគេបានឃើញរឿងនោះ ពួកគេបានបដិសេធមិនបន្តមើលទេ។

លោក Katz បានចោទប្រកាន់លោកស្រី Greta និងក្រុមការងារផ្សេងទៀតលើនាវានោះ ថាមិនអើពើនឹងអំពើឃោរឃៅរបស់ក្រុមហាម៉ាស ដោយបិទភ្នែករបស់ពួកគេចំពោះការពិត ។

សម្ព័ន្ធ Freedom Flotilla (FFC) បាននិយាយថា យោធាអ៊ីស្រាអែលបានវាយប្រហារ និងឡើងលើនាវាដោយខុសច្បាប់ ខណៈនាវាMadleen កំពុងព្យាយាមផ្តល់ជំនួយដល់តំបន់ហ្កាហ្សា ជាទីដែលមានសង្រ្គាមជាង ៦០០ ថ្ងៃ និងការរារាំងជំនួយទាំងអស់របស់អ៊ីស្រាអែលរយៈពេល១១ សប្តាហ៍ បានរុញច្រានប្រជាជន២,១លាននាក់នៃដែនដីរងការឡោមព័ទ្ធនិងទម្លាក់គ្រាប់បែកឥតឈប់នេះឱ្យធ្លាក់កាន់តែជ្រៅទៅក្នុងវិបត្តិ៕