មន្ត្រីនៃក្រសួងផែនការ ចាប់ពីថ្ងៃទី ៩ ខែមិថុនា ឆ្នាំ ២០២៥នេះ បានចាប់ផ្ដើមចុះទៅតាមខ្នងផ្ទះ ដើម្បីសម្ភាសប្រមូលទិន្នន័យសម្រាប់ការងារអង្កេតសេដ្ឋកិច្ច សង្គមកិច្ចឆ្នាំ ២០២៥។ ការងារចុះសម្ភាសប្រមូលទិន្នន័យនេះ អនុវត្តលើគ្រួសារគំរូជាង ១២ ០០០គ្រួសារដែលត្រូវបានជ្រើសរើសទូទាំងប្រទេស។

មន្ត្រីចុះសម្ភាស និងមន្ត្រីត្រួតពិនិត្យនៃក្រសួងផែនការ បានចាប់ផ្ដើមចុះសម្ភាសប្រមូលទិន្នន័យនៅតាមខ្នងផ្ទះ ចាប់ពីថ្ងៃទី ៩ ខែមិថុនា ឆ្នាំ ២០២៥នេះ រហូតដល់ដើមខែ មិថុនា ឆ្នាំ ២០២៦ខាងមុខ។ ការប្រមូលទិន្នន័យសម្រាប់ការងារអង្កេតសេដ្ឋកិច្ច សង្គមកិច្ចឆ្នាំ ២០២៥ ជាការផ្លាស់ប្ដូរថ្មី ដោយប្រើប្រាស់ ម៉ាស៊ីនថាបប្លេតទាំងស្រុងដើម្បីពន្លឿនការងារ និងបញ្ចៀសកំហុសឆ្គងនានា។

ក្នុងការចាប់ផ្ដើមការងារប្រមូលទិន្នន័យថ្ងៃដំបូងនេះ លោក យិត វុទ្ធី ជាមន្ត្រីត្រួតពិនិត្យដែលចុះផ្ទាល់ជាមួយមន្ត្រីសម្ភាសនៅទីតាំងសង្កាត់ដង្កោ ខណ្ឌដង្កោ រាជធានីភ្នំពេញ លើកឡើងថាការងារប្រមូលទិន្នន័យនេះ ជាដំណាក់កាលសំខាន់ ដែលក្រុមការងារត្រូវប្រមូលទិន្នន័យឱ្យបានគ្រប់ទៅតាមតារាងសំណួរ។

លោកថា ការសម្ភាសប្រមូលទិន្នន័យចំណាយពេលវេលាច្រើនសម្រាប់គ្រួសារគំរូនីមួយៗ ដោយមានរហូតដល់ប្រមាណ ១ ០០០សំណួរ ហើយសំណួរខ្លះអាចមានតំណាងគ្រួសារតែម្នាក់ឆ្លើយជំនួស និងមានសំណួរខ្លះ ត្រូវសួរសមាជិកគ្រួសារនីមួយៗ ទើបទទួលបានព័ត៌មានដែលអង្កេតសេដ្ឋកិច្ច សង្គមកិច្ចឆ្នាំ ២០២៥ត្រូវការ។

សម្រាប់ការងារអង្កេតសេដ្ឋកិច្ច សង្គមកិច្ចនេះ ជាកិច្ចការសំខាន់ ដែលវិទ្យាស្ថានជាតិស្ថិតិ នៃក្រសួងផែនការ អនុវត្តរៀងរាល់ពីរឆ្នាំម្ដង។ លទ្ធផលនៃអង្កេតសេដ្ឋកិច្ច សង្គមកិច្ច ជាទិន្នន័យសំខាន់ ដែលរាជរដ្ឋាភិបាលកម្ពុជា ត្រូវការសម្រាប់ការបង្កើតគោលនយោបាយ គណនាភាពក្រីក្រ គណនាកំណើនសេដ្ឋកិច្ចជាតិ និងប្រើប្រាស់ក្នុងគោលដៅជាច្រើនផ្សេងទៀត។

ការងារអង្កេតសេដ្ឋកិច្ច និងសង្គមកិច្ចកម្ពុជានេះ អនុវត្តតាំងពីដើមទសវត្សរ៍ឆ្នាំ ១៩៩០មកម្លេះ ក្រោមជំនួយពីដៃគូអភិវឌ្ឍន៍ និងបន្តរហូតដល់បច្ចុប្បន្នក្រោមការចំណាយថវិកាទាំងស្រុងដោយរាជរដ្ឋាភិបាលកម្ពុជា និងមានការបន្តជួយគាំទ្របច្ចេកទេសពីដៃគូ។ អត្ថបទ៖គឹមហុក