ទាហានឆ្មាំជាតិរាប់រយនាក់បានទៅដល់កណ្តាលទីក្រុង Los Angeles រដ្ឋ California កាលពីព្រឹកថ្ងៃអាទិត្យ បន្ទាប់ពីប្រធានាធិបតីTrump បានបញ្ជាឱ្យដាក់ពង្រាយនិងត្រៀមប្រមាណ២.០០០នាក់បន្ថែមទៀត បន្ទាប់ពីការប៉ះទង្គិចគ្នាយ៉ាងហិង្សាជាច្រើនថ្ងៃរវាងមន្ត្រីអនុវត្តច្បាប់ និងក្រុមអ្នកតវ៉ាចាប់តាំងពីថ្ងៃសុក្រសប្ដាហ៍មុន។បាតុកម្មជាបន្តបន្ទាប់បានផ្ទុះឡើងក្រោយប្រតិបត្តិការអនុវត្តច្បាប់អន្តោប្រវេសន៍ជាច្រើន ត្រូវបានធ្វើឡើងនៅទូទាំងរដ្ឋកាលីហ្វ័រនីញ៉ាភាគខាងត្បូងកាលពីថ្ងៃសុក្រ។

ស្នងការនគរបាលក្រុង Los Angeles បានបញ្ជាក់ថា មនុស្ស ៥០ នាក់ត្រូវបានចាប់ខ្លួនរហូតមកដល់ពេលនេះភាគច្រើនជាក្រុមបាតុករដែលមិនព្រមបំបែកជួរ  បន្ទាប់ពីការតវ៉ាដែលបានឈានដល់ការបិទតំបន់ជាច្រើនក្នុងទីក្រុង LA រួមទាំងផ្លូវ 101 Freeway ផងដែរ។ អ្នកនាំពាក្យនគរបាលបាននិយាយថា មនុស្សដែលត្រូវបានចាប់ខ្លួន ត្រូវបានចោទប្រកាន់សម្រាប់ឧក្រិដ្ឋកម្មផ្សេងៗគ្នា រួមទាំងការមិនព្រមបំបែកជួរ ការវាយប្រហារដោយអាវុធទៅលើមន្ត្រីនគរបាល ការលួច និងការដុតបំផ្លាញជាដើម។មន្ត្រីប្រាំនាក់បានរងរបួសក្នុងអំឡុងពេលព្រឹត្តិការណ៍កាលពីចុងសប្តាហ៍មុននេះ ។៣នាក់ត្រូវបានគេព្យាបាលនៅកន្លែងកើតហេតុ និងពីរនាក់ទៀតរងរបួសស្រាល។

ស្នងការនគរបាលដដែល និងនាយកដ្ឋានតម្រួតប្រចាំសង្កាត់ LA បានប្រកាសថាការជួបជុំនេះខុសច្បាប់ ហើយបានបញ្ជាឱ្យមនុស្សត្រឡប់ទៅផ្ទះវិញ។អស់រយៈពេលបួនថ្ងៃជាប់ៗគ្នា ហ្វូងបាតុករដ៏ធំបានប្រមូលផ្តុំគ្នានៅកណ្តាលទីក្រុង Los Angeles ដោយភាគច្រើននៃបាតុកម្មរបស់ពួកគេធ្វើឡើងនៅខាងក្រៅអគារសហព័ន្ធ Robert Young ។ ទោះបីជាការជួបជុំកាលពីរសៀលថ្ងៃចន្ទភាគច្រើនជាការតវ៉ាស្ងៀមស្ងាត់ក៏ដោយ ស្ថានការណ៍បានកើនឡើងនៅម៉ោងប្រហែល ៥ និង៣០ នាទីល្ងាច នៅពេលមន្រ្តីស្នងការនគរបាល LAPD បានចាប់ផ្តើមរុញហ្វូងមនុស្សចេញពីតំបន់នោះ ហើយមានការប៉ះទង្គិចគ្នា ជាបន្តបន្ទាប់រវាងអ្នកតវ៉ាមួយចំនួន និងកងកម្លាំងនគរបាល ៕