ក្រុមអ្នកតវ៉ា រួមមានសាស្ត្រាចារ្យ និងនិស្សិត បានមកប្រមូលផ្តុំគ្នានៅខាងមុខអគាររដ្ឋាភិបាល ក្នុងទីក្រុង Belgrade កាលពីថ្ងៃចន្ទ ទី៩ ខែមិថុនា ដោយនិយាយថា ពួកគេនឹងបិទច្រកចូល រហូតដល់អាជ្ញាធរគោរព «សិទ្ធិសេរីភាពរបស់សាកលវិទ្យាល័យ»។

ហ្វូងមនុស្ស បានបិទចរាចរណ៍ និងបោះតង់នៅខាងក្រៅអគារធំមួយកន្លែង។ ក្រុមបាតុករ បានគ្រវីទង់ជាតិ ដើរដង្ហែក្បួន និងផ្លុំកញ្ចែ ខណៈកាន់បដានានាដែលមានពាក្យស្លោកដូចជា «គ្មានការផ្លាស់ប្តូរទេ បើគ្មានបដិវត្តន៍» និងពាក្យថា «សេរីភាពប្រជាជន»។

ការតវ៉ានេះ ត្រូវបានរៀបចំឡើងដោយសហគមន៍សិក្សានៅប្រទេសស៊ែរប៊ី ដើម្បីបង្ហាញការប្រឆាំងទៅនឹងការគំរាមកំហែង និងការដាក់ទណ្ឌកម្ម លើបុគ្គលិកសាកលវិទ្យាល័យ។

សាស្ត្រាចារ្យ លោក Jovana Bila-Jovanic បាននិយាយថា «ការប្រមូលផ្តុំគ្នានេះ ត្រូវបានកោះហៅដោយសហគមន៍សិក្សានៅប្រទេសស៊ែរប៊ី និងបុគ្គលិកនៅសាកលវិទ្យាល័យ ដូច្នេះយើងនិយាយឱ្យកាន់តែច្បាស់ថា ការគាបសង្កត់ ការគំរាមកំហែង ការបំភ័យ និងការដាក់ទណ្ឌកម្មលើពួកយើង គឺមិនព្រមដាច់ខាត ហើយយើងនឹងមិនបណ្តោឱ្យពួកគេធ្វើបានឡើយ។

ការប្រមូលផ្តុំគ្នាប្រចាំថ្ងៃ ដែលដឹកនាំដោយនិស្សិតបន្ទាប់ពីការបាក់រលំដំបូលនៅស្ថានីយ៍រថភ្លើងនៅទីក្រុង Novi Sad កាលពីខែវិច្ឆិកា បណ្តាលឲ្យមនុស្សរាប់សិបនាក់ស្លាប់ បានរាលដាលពាសពេញប្រទេសស៊ែរប៊ី ហើយបានក្លាយជាបញ្ហាប្រឈមធំបំផុតចំពោះការគ្រប់គ្រងរយៈពេល១២ឆ្នាំរបស់លោកប្រធានាធិបតី Aleksandar Vucic ដោយក្រុមអ្នកតវ៉ា បានរិះគន់ចំពោះអំពើពុករលួយរាលដាល និងអសមត្ថភាព ដែលនាំឱ្យមានមហន្តរាយ។