នៅថ្ងៃអង្គារនេះ មានរយៈពេលពីរសប្តាហ៍ ចាប់តាំងពីអង្គការដឹកនាំដោយសហរដ្ឋអាមេរិក បានចាប់ផ្តើមកិច្ចខិតខំប្រឹងប្រែងចែកចាយស្បៀងអាហារ នៅក្នុងតំបន់ហ្កាហ្សាស្ទ្រីប។

អាជ្ញាធរតំបន់ហ្កាហ្សានិយាយថា មនុស្សជាង១៣០នាក់ ត្រូវបានសម្លាប់ក្នុងអំឡុងពេលនោះ។ កង្វះស្បៀងអាហារធ្ងន់ធ្ងរ កំពុងបន្តនៅក្នុងតំបន់ហ្កាហ្សា ខណៈអ៊ីស្រាអែលបន្តប្រតិបត្តិការយោធារបស់ខ្លួន និងរឹតបន្តឹងការដឹកជញ្ជូនជំនួយមនុស្សធម៌ ចូលទៅក្នុងតំបន់នោះ។

មូលនិធិមនុស្សធម៌តំបន់ហ្កាហ្សា ដឹកនាំដោយសហរដ្ឋអាមេរិក បានចាប់ផ្តើមចែកចាយស្បៀងអាហារ កាលពីចុងខែមុន ជំនួសឱ្យកម្មវិធីដែលគាំទ្រដោយអង្គការសហប្រជាជាតិ។ មូលនិធិនេះ បាននិយាយថា រហូតមកដល់ពេលនេះ អង្គការបានផ្តល់ស្បៀងអាហារជាង ១០ លានកញ្ចប់ដល់អ្នកស្រុក។

ទោះជាយ៉ាងណា តាមសេចក្តីរាយការណ៍ មនុស្សជាច្រើននាក់បានស្លាប់ និងរងរបួស ខណៈកងកម្លាំងអ៊ីស្រាអែល បានបើកការបាញ់ប្រហារទៅលើហ្វូងមនុស្សនៅជុំវិញកន្លែងចែកចាយជំនួយ។ អាជ្ញាធរក្នុងតំបន់និយាយកាលពីថ្ងៃចន្ទថា ជនស៊ីវិលជាង១៣០នាក់ ត្រូវបានសម្លាប់ក្នុងអំឡុងពេលពីរសប្តាហ៍។ យោធាអ៊ីស្រាអែលបាននិយាយថា ខ្លួនបានបាញ់ព្រមានទៅលើមនុស្សដែលចូលមកជិតទាហានរបស់ខ្លួន និងបាននិយាយថា ក្រុមហាម៉ាស កំពុងនិយាយបំផ្លើសពីចំនួនអ្នកស្លាប់ និងរងរបួស។

អង្គការសហប្រជាជាតិ បានរិះគន់កម្មវិធីរបស់ក្រុមដឹកនាំដោយសហរដ្ឋអាមេរិក ព្រោះកម្មវិធីនេះបង្ខំអ្នកស្រុកទាំងហ្វូងឱ្យធ្វើដំណើរទៅកាន់កន្លែងផ្តល់ស្បៀងអាហារ។ អង្គការសហប្រជាជាតិកំពុងអំពាវនាវឱ្យអ៊ីស្រាអែលដកចេញការរឹតត្បិតរបស់ខ្លួនលើការដឹកជញ្ជូនស្បៀងអាហារ។