កងទ័ពជើងទឹកអ៊ីស្រាអែល បានវាយប្រហារចំណតផែនៅក្នុងទីក្រុងកំពង់ផែ Hodeida ដែលគ្រប់គ្រងដោយក្រុមឧទ្ទាមហ៊ួទី របស់ប្រទេសយេម៉ែន នៅថ្ងៃអង្គារ (១០ មិថុនា) នេះ ដែលទំនងជាបំផ្លាញសម្ភារៈបរិក្ខារសំខាន់ៗក្នុងការផ្តល់ជំនួយដល់ការដឹកជញ្ជូនទៅកាន់ប្រទេសដែលរួមរឹតដោយភាពស្រេកឃ្លាន និងសង្រ្គាមមួយនេះ។

យោធាអ៊ីស្រាអែលនិយាយថា នាវាមីស៊ីលរបស់កងទ័ពជើងទឹក បានបើកការវាយប្រហារនេះ ដែលជាលើកដំបូងហើយដែលកងកម្លាំងអ៊ីស្រាអែល ចូលរួមក្នុងការវាយលុកប្រឆាំងនឹងក្រុមឧទ្ទាមហ៊ួទី។ ការវាយប្រហារនៅថ្ងៃអង្គារនេះ កើតឡើងនៅពេលក្រុមហ៊ួទី បាញ់មីស៊ីល និងយានដ្រូនម្តងហើយម្តងទៀត សំដៅលើអ៊ីស្រាអែល អំឡុងសង្គ្រាមរបស់ខ្លួនលើក្រុមហាម៉ាស នៅតំបន់ហ្កាហ្សាស្ទ្រីប។

ក្រុមហ៊ួទី បានប្រកាសពីការវាយប្រហារនេះ តាមរយៈបណ្តាញព័ត៌មានផ្កាយរណប al-Masirah របស់ពួកគេ ដោយនិយាយថា ការវាយប្រហារបានកំណត់គោលដៅចំណតកំពង់ផែ ប៉ុន្តែមិនបញ្ជាក់លម្អិតឡើយ។ កាលពីល្ងាចថ្ងៃចន្ទ អ៊ីស្រាអែល បានចេញការព្រមានតាមអ៊ិនធឺណិតដល់ពលរដ្ឋយេម៉ែន ឱ្យជម្លៀសចេញពីកំពង់ផែ Ras Isa, Hodeida និង al-Salif ដោយចោទថា ក្រុមហ៊ួទី ប្រើប្រាស់កំពង់នោះសម្រាប់ការវាយប្រហាររបស់ខ្លួន។

ក្រុមហ៊ួទី បាននិងកំពុងបើកការវាយប្រហារដោយមីស៊ីល និងយានដ្រូនជាបន្តបន្ទាប់ប្រឆាំងនឹងនាវាពាណិជ្ជកម្ម និងយោធាក្នុងតំបន់ នៅក្នុងអ្វីដែលថ្នាក់ដឹកនាំក្រុមនេះបានពណ៌នាថាជាកិច្ចប្រឹងប្រែងដើម្បីបញ្ចប់ការវាយលុករបស់អ៊ីស្រាអែល លើតំបន់ហ្កាហ្សា៕