យោងតាមរបាយការណ៍ថ្មីមួយរបស់មូលនិធិប្រជាជនអង្គការសហប្រជាជាតិ (UNFPA) ដែលជាទីភ្នាក់ងារអង្គការសហប្រជាជាតិសម្រាប់សិទ្ធិបន្តពូជ បានបង្ហាញឱ្យដឹងថា ស្ថានភាពដែលស្រ្តីទូទាំងពិភពលោក មិនមានលទ្ធភាពយកកូនឱ្យបានច្រើន កំពុងក្លាយជាបទដ្ឋានសកល និងជាហេតុធ្វើឱ្យអត្រាមានកូនរបស់ស្រ្តី ធ្លាក់ចុះ "ក្នុងកម្រិតមិនធ្លាប់មានពីមុនមក"។

ទីភ្នាក់ងារ UNFPA នេះបានចេញការប្រកាសអាសន្នដ៏ធំបំផុតរបស់ខ្លួននៅលើការធ្លាក់ចុះនៃការមានកូនសកល ដោយព្រមានថា មនុស្សរាប់រយលាននាក់មិនមានលទ្ធភាពមានកូនដូចដែលពួកគេចង់បាននោះទេ ដោយលើកឡើងពីហេតុផលមួយចំនួនដូចជា តម្លៃចំណាយដ៏ខ្ពស់ក្នុងនាមជាឪពុកម្តាយ និងកង្វះដៃគូស័ក្ដិសម ព្រមទាំងកត្តាជាច្រើនផ្សេងទៀត។

UNFPA បានស្ទង់មតិមនុស្ស ១៤.០០០នាក់ នៅក្នុងប្រទេសចំនួន១៤ អំពីបំណងនៃការមានកូនរបស់ពួកគេ ហើយលទ្ធផលបង្ហាញថា ម្នាក់ក្នុងចំណោមប្រាំនាក់បាននិយាយថា ពួកគេមិនមាន ឬរំពឹងថា ពួកគេនឹងអាចមានកូនដូចដែលចង់បាននោះទេ។ លោកស្រី Natalia Kanem ប្រធាន UNFPA និយាយថា "ពិភពលោកបានចាប់ផ្តើមការធ្លាក់ចុះនៃអត្រាមានកូន ក្នុងកម្រិតមិនធ្លាប់មានពីមុនមក"។

ប្រទេសដែលបានស្ទង់មតិទាំងនោះមានដូចជា កូរ៉េខាងត្បូង ថៃ អ៊ីតាលី ហុងគ្រី អាល្លឺម៉ង់ ស៊ុយអែត ប្រេស៊ីល ម៉ិកស៊ិក សហរដ្ឋអាមេរិក ឥណ្ឌា ឥណ្ឌូនេស៊ី ម៉ារ៉ុក អាហ្វ្រិកខាងត្បូង និងនីហ្សេរីយ៉ា ដែលជាប្រទេសមានចំនួនមួយភាគបីនៃចំនួនប្រជាជនសរុបក្នុងពិភពលោក៕