អង់គ្លេស៖ ចក្រភពអង់គ្លេសបានរាយការណ៍ករណីឆ្លងថ្មីប្រចាំថ្ងៃនៃវីរុស COVID-19 ជាង ១សែននាក់ជាលើកដំបូងចាប់តាំងពីការធ្វើតេស្តទ្រង់ទ្រាយធំ ដោយមានករណីឆ្លងចំនួន ១០៦,១២២នាក់កាលពីថ្ងៃពុធខ្ពស់ជាងកាលពីថ្ងៃអង្គារដែលមានត្រឹម ៩០,៦២៩នាក់។
យោងតាមទិន្នន័យរដ្ឋាភិបាលឲ្យដឹងថា ការឆ្លងរាលដាលយ៉ាងឆាប់រហ័សនៃវីរុសបម្លែងខ្លួនថ្មី Omicron បានហក់ឡើងខ្ពស់យ៉ាងតិច ៧ថ្ងៃមកហើយ ដោយនាំឲ្យករណីឆ្លងវីរុសបម្លែងខ្លួនថ្មីចុងក្រោយនេះសរុបឡើងដល់ ៦៤៣,២១៩នាក់ ឬស្មើនឹង ៥៩%។ រដ្ឋាភិបាលអង់គ្លេសបាននិយាយកាលពីថ្ងៃពុធថា ខ្លួនកំពុងកាត់បន្ថយពេលវេលាដាក់ឲ្យនៅដាច់ដោយឡែកពីរយៈពេល ១០ថ្ងៃមកនៅត្រឹម ៧ថ្ងៃសម្រាប់មនុស្សនៅក្នុងចក្រភពអង់គ្លេស ដែលមានលទ្ធផលតេស្ត COVID-19 អវិជ្ជមានក្នុងការធ្វើតេស្ត ២ថ្ងៃជាប់គ្នា។
លោកនាយករដ្ឋមន្ត្រីអង់គ្លេស Boris Johnson កាលពីថ្ងៃអង្គារបានច្រានចោលការរឹតត្បិតថ្មី មុនពិធីបុណ្យណូអែលដោយនិយាយថា មានភាពមិនច្បាស់លាស់អំពីភាពធ្ងន់ធ្ងរនៃវីរុសបម្លែងខ្លួនថ្មី Omicron និងអត្រាអ្នកចូលសម្រាកព្យាបាលនៅមន្ទីរពេទ្យ។ យោងតាមទិន្នន័យពីរដ្ឋាភិបាលមានអ្នកជំងឺវីរុសបម្លែងខ្លួនថ្មី Omicron ចំនួន ១៩៥នាក់បានចូលសម្រាកព្យាបាលកាលពីថ្ងៃអង្គារ និងស្លាប់ ១៨នាក់ដោយសារវីរុសបម្លែងខ្លួនថ្មីនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
