ប្រធានាធិបតីអាមេរិក លោក Donald Trump កាលពីថ្ងៃចន្ទ (ទី៩ ខែមិថុនា) បាននិយាយថា លោកមិនមានគម្រោងផ្ដាច់ឈប់ប្រើប្រាស់សេវាអ៊ីនធឺណិត Starlink នៅសេតវិមាននោះឡើយ ប៉ុន្តែអាចនឹងដករថយន្ត Tesla របស់លោកចេញ បន្ទាប់ពីមានការប្រកាសរបស់លោកកាលពីចុងសប្តាហ៍ ដែលថា ទំនាក់ទំនងរបស់លោកជាមួយលោក Elon Musk ដែលជានាយកប្រតិបត្តិមហាសេដ្ឋីនៃក្រុមហ៊ុនទាំង២ បានចប់ហើយ។

ដោយសំដៅទៅលើក្រុមហ៊ុនអ៊ីនធឺណិតផ្កាយរណបដែលផ្តល់សេវាអ៊ីនធឺណិតល្បឿនលឿន លោក Trump បានប្រាប់អ្នកសារព័ត៌មានថា៖ «ខ្ញុំអាចនឹងយករថយន្ត Tesla ចេញ ប៉ុន្តែខ្ញុំមិនគិតថា យើងនឹងធ្វើបែបនេះជាមួយសេវា Starlink នោះទេ។ នេះគឺជាសេវាកម្មដ៏ល្អ»។

គួរបញ្ជាក់ថា សេវាអ៊ីនធឺណិត Starlink គឺជាផ្នែកនៃក្រុមហ៊ុន SpaceX របស់លោក Musk។ កាលពីខែមីនា លោក Trump បាននិយាយថា លោកបានទិញរថយន្ត Tesla Model S ពណ៌ក្រហមពីលោក Musk ដែលជាសម្ព័ន្ធមិត្តជិតស្និទ្ធរបស់លោក Trump។

កាលពីសប្តាហ៍មុន មន្ត្រីសេតវិមានបានប្រាប់ថា លោក Trump អាចនឹងយកឡាននោះចេញ បន្ទាប់ពីជម្លោះជាសាធារណៈ បានផ្ទុះឡើង រវាងបុគ្គលដ៏មានមុខមាត់ទាំង២។ រថយន្ត Tesla នោះ ត្រូវបានគេឃើញចតចោល នៅសេតវិមានកាលពីចុងសប្តាហ៍។

កាលពីថ្ងៃទី៧ ខែមិថុនា លោក Trump បាននិយាយថា លោកគ្មានបំណងផ្សះផ្សាទំនាក់ទំនងជាមួយលោក Musk ទេ។ តែកាលពីថ្ងៃចន្ទ (ទី៩ ខែមិថុនា) លោកប្រធានាធិបតីអាមេរិករូបនេះ បានបញ្ជាក់ថា លោកនឹងមិនមានបញ្ហាអ្វីនោះទេ ប្រសិនបើលោក Musk ទូរសព្ទជជែកជាមួយលោក៕