ក្រសួងការបរទេសអ៊ីរ៉ង់ នៅថ្ងៃអង្គារ (ទី១០ ខែមិថុនា) នេះ បានប្រាប់ឲ្យដឹងថា កិច្ចចរចានុយក្លេអ៊ែរជុំថ្មីជាមួយសហរដ្ឋអាមេរិក កំពុងត្រូវបានគ្រោងធ្វើនៅថ្ងៃអាទិត្យចុងសប្ដាហ៍នេះ បន្ទាប់ពីលោកប្រធានាធិបតី Donald Trump បាននិយាយថា ការជួបគ្នានោះ ត្រូវបានរំពឹងកើតមាននៅថ្ងៃព្រហស្បតិ៍។

នៅក្នុងសេចក្តីថ្លែងការណ៍មួយ នាថ្ងៃអង្គារនេះ អ្នកនាំពាក្យក្រសួងការបរទេស លោក Esmaeil Baqaei បានឲ្យដឹងថា «ជុំបន្ទាប់នៃកិច្ចចរចាដោយប្រយោល រវាងអ៊ីរ៉ង់ និងសហរដ្ឋអាមេរិក កំពុងត្រូវបានគ្រោងទុក សម្រាប់ថ្ងៃអាទិត្យចុងសប្ដាហ៍នេះ នៅក្នុងទីក្រុង Muscat ប្រទេសអូម៉ង់» ដោយបន្ថែមថា សប្ដាហ៍នេះ រដ្ឋមន្ត្រីការបរទេស និងជាប្រធានក្រុមចរចា លោក Abbas Araghchi នឹងចូលរួមក្នុងវេទិកា Oslo របស់ប្រទេសន័រវេស ដែលជាព្រឹត្តិការណ៍ប្រមូលផ្តុំអ្នកសម្របសម្រួលជម្លោះ។

គួរបញ្ជាក់ថា អ៊ីរ៉ង់ និងសហរដ្ឋអាមេរិក បានជួបពិភាក្សាគ្នាចំនួន ៥ជុំមកហើយ គិតចាប់តាំងពីខែមេសា ដោយត្រូវបានធ្វើឡើងក្នុងគោលបំណងឈានដល់កិច្ចព្រមព្រៀងនុយក្លេអ៊ែរថ្មី ដើម្បីជំនួសកិច្ចព្រមព្រៀងឆ្នាំ២០១៥ ជាមួយប្រទេសមហាអំណាចដែលលោក Trump បានបោះបង់ចោល ក្នុងអំឡុងពេលអាណត្តិដំបូងរបស់លោក ក្នុងឆ្នាំ២០១៨។

កាលពីថ្ងៃទី៣១ ខែឧសភា បន្ទាប់ពីកិច្ចចរចាជុំទី៥ អ៊ីរ៉ង់បានប្រាប់ឲ្យដឹងថា ខ្លួនបានទទួល «លក្ខខណ្ឌ» នៃសំណើរបស់សហរដ្ឋអាមេរិក សម្រាប់កិច្ចព្រមព្រៀងនុយក្លេអ៊ែរ ដោយលោក Araghchi ក្រោយមក បាននិយាយថា អត្ថបទនេះមាន «ភាពមិនច្បាស់លាស់»។

ហើយកាលពីថ្ងៃចន្ទ អ៊ីរ៉ង់បានបញ្ជាក់ថា សំណើរបស់សហរដ្ឋអាមេរិកគឺ «ខ្វះលក្ខខណ្ឌ» ដែលឆ្លុះបញ្ចាំងពីការចរចាពីមុន ហើយថា ខ្លួននឹងបង្ហាញសំណើបដិការ «សមហេតុផល សមស្រប និងតុល្យភាព» ដល់សហរដ្ឋអាមេរិកតាមរយៈអ្នកសម្របសម្រួលអូម៉ង់៕