យោងតាមសេចក្ដីរាយការណ៍ បានឲ្យដឹងថា យ៉ាងហោចណាស់មនុស្ស ៨នាក់ បានបាត់បង់ជីវិត នៅក្នុងហេតុការណ៍បាញ់ប្រហារ នៅសាលារៀនមួយកន្លែង ក្នុងទីក្រុង Graz ប្រទេសអូទ្រីស នាថ្ងៃអង្គារ (ទី១០ ខែមិថុនា) នេះ។

ដោយដកស្រង់សារព័ត៌មានក្នុងស្រុក ទូរទស្សន៍រដ្ឋ ORF បានរាយការណ៍ថា មនុស្សជាច្រើននាក់ផ្សេងទៀត បានរងរបួស ក្នុងនោះរួមមានទាំងសិស្ស និងគ្រូផងដែរ។ ចំណែកក្រសួងមហាផ្ទៃអូទ្រីស បានបញ្ជាក់ថា មានអ្នកស្លាប់ និងរបួសជាច្រើននាក់ ប៉ុន្តែមិនបានបង្ហាញព័ត៌មានលម្អិតបន្ថែមទៀតឡើយ។

សេចក្ដីរាយការណ៍ អះអាងថា ជនបង្កហេតុ ដែលសម្រាប់ពេលនេះ ត្រូវបានគេចាត់ទុកថា ជាសិស្សនោះ បានសម្លាប់ខ្លួនឯង។ ប្រតិបត្តិការនគរបាល កំពុងដំណើរការទៅក្នុងសាលារៀន BORG នាព្រឹកថ្ងៃអង្គារនេះ។

អ្នកនាំពាក្យនគរបាលក្រុង Graz លោក Sabri Yorgun បានប្រាប់ថា អង្គភាពពិសេស Cobra ស្ថិតក្នុងចំណោមក្រុមដែលត្រូវបានបញ្ជូនទៅសាលាវិទ្យាល័យនេះ បន្ទាប់ពីបានទទួលការហៅទូរសព្ទ នៅវេលាម៉ោង ១០ព្រឹក (ម៉ោងក្នុងស្រុក) ហើយអាជ្ញាធរកំពុងធ្វើការ ដើម្បីវាយតម្លៃទិដ្ឋភាពទូទៅ ជុំវិញអ្វីដែលបានកើតឡើង។

សេវាសង្គ្រោះបន្ទាន់ផ្សេងទៀត និងឧទ្ធម្ភាគចក្រ ត្រូវបានបញ្ជូនទៅកាន់កន្លែងកើតហេតុ។ នៅវេលាម៉ោង ១១:៣០ព្រឹក (ម៉ោងក្នុងស្រុក) នគរបាលបានសរសេរនៅលើបណ្តាញសង្គម X ថា អ្នកនៅក្នុងសាលារៀន ត្រូវបានជម្លៀសចេញ ហើយត្រូវបាននាំទៅកន្លែងមានសុវត្ថិភាព៕