មេដឹកនាំឆ្វេងនិយមរបស់ប្រទេសកូឡុំប៊ី កាលពីថ្ងៃចន្ទ (ទី៩ ខែមិថុនា) បានអះអាងថា ក្រុមសន្តិសុខការពារបេក្ខជនប្រជែងតំណែងប្រធានាធិបតីដែលរងរបួសយ៉ាងធ្ងន់ធ្ងរ ត្រូវបាន «កាត់បន្ថយយ៉ាងចម្លែក» មុនពេលរូបលោកត្រូវបានបាញ់ប្រហារ ដោយលើកឡើងថា ប្រហែលជាមានគម្រោងសមគំនិតគ្នាទុកមុន។

សូមបញ្ជាក់ថា សមាជិកព្រឹទ្ធសភាអភិរក្សនិយម លោក Miguel Uribe វ័យ ៣៩ឆ្នាំ ត្រូវបានបាញ់ចំក្បាលចំនួន ២គ្រាប់ ក្នុងចម្ងាយដ៏កៀកដោយអ្នកខ្មាន់កាំភ្លើងអាយុ ១៥ឆ្នាំ ខណៈពេលកំពុងធ្វើយុទ្ធនាការកាលពីថ្ងៃទី៧ ខែមិថុនា នៅទីក្រុង Bogota។

ការបាញ់ប្រហារដ៏សាហាវនេះ បានធ្វើឲ្យប្រជាជនកូឡុំប៊ីមានការភ្ញាក់ផ្អើល និងបានជំរុញឲ្យមានការជជែកយ៉ាងក្តៅគគុក អំពីថា តើអ្នកណាគឺជាអ្នកត្រូវទទួលខុសត្រូវ។ អាជ្ញាធរចោទប្រកាន់ជនសង្ស័យថា ជាអ្នកជួលកាំភ្លើង ប៉ុន្តែទទួលស្គាល់ថា ពួកគេនៅមានតម្រុយតិចតួច អំពីអ្នកដែលជួលជនល្មើស ឬហេតុផលដែលបង្កឲ្យមានការបាញ់ប្រហារនេះ។

ដោយលោក Uribe កំពុងតស៊ូដើម្បីរស់រានមានជីវិត នៅឯមន្ទីរពេទ្យ លោកប្រធានាធិបតី Gustavo Petro នៅថ្ងៃទី៩ ខែមិថុនា មិនបានធ្វើអ្វីដើម្បីបន្ថយកម្ដៅនយោបាយនោះឡើយ។ លោកប្រធានាធិបតីរូបនេះបានប្រើប្រាស់បណ្ដាញសង្គម ដើម្បីចោទគូប្រជែងខ្លះថា ធ្វើនយោបាយលើទិដ្ឋភាពសោកនាដកម្មនេះ។

ហើយលោកក៏បានអះអាងដែរថា ចំនួនអង្គរក្សដែលត្រូវបានប្រគល់ឲ្យលោក Uribe ត្រូវបាន «កាត់បន្ថយយ៉ាងចម្លែក» ពីចំនួន ៧នាក់ មកត្រឹម ៣នាក់ នៅថ្ងៃបាញ់ប្រហារនោះ ខណៈពេលដែលអំពាវនាវឲ្យមានការស៊ើបអង្កេតឲ្យបានម៉ត់ចត់៕