នៅក្នុងខែនេះ រដ្ឋាភិបាលប៉ាគីស្ថាន បានប្រកាសថា ប្រទេសចិនបានយល់ព្រមលក់ឧបករណ៍យោធាថ្មីរបស់ខ្លួន រួមទាំងយន្តហោះចម្បាំង J-35 ជំនាន់ទី៥កម្រិតខ្ពស់ចំនួន ៤០គ្រឿង និងប្រព័ន្ធការពារមីស៊ីលបាលីស្ទីក បន្ទាប់ពីជម្លោះប្រដាប់អាវុធរបស់ទីក្រុងអ៊ីស្លាម៉ាបាដជាមួយឥណ្ឌា កាលពីខែឧសភា។

ប្រទេសជិតខាងប្រដាប់អាវុធនុយក្លេអ៊ែរ ឥណ្ឌា និងប៉ាគីស្ថាន បានចូលរួមក្នុងជម្លោះប្រដាប់អាវុធរយៈពេល ៤ថ្ងៃ ចាប់ពីថ្ងៃទី ០៧ ដល់ថ្ងៃទី ១០ ខែឧសភា ដោយវាយតប់គ្នាទៅវិញទៅមក ដោយកាំភ្លើងធំ យន្តហោះចម្បាំង យានដ្រូន និងមីស៊ីល។ ការប្រយុទ្ធគ្នា ត្រូវបានបញ្ឈប់នៅថ្ងៃទី ១០ ខែឧសភា នៅពេលដែលប្រធានាធិបតីអាមេរិកលោក ដូណាល់ ត្រាំ បានប្រកាសថា ប្រទេសទាំងពីរ បានយល់ព្រមលើបទឈប់បាញ់មួយ។

ប៉ាគីស្ថានបាននិយាយថា កងទ័ពអាកាសរបស់ខ្លួន បានបាញ់ទម្លាក់យន្តហោះចម្បាំងឥណ្ឌាចំនួន ៦ គ្រឿង ដោយប្រើយន្តហោះ J-10C របស់ចិន កាលពីយប់ថ្ងៃទី ០៦ ខែឧសភា។ កាលពីថ្ងៃទី ៣១ ខែឧសភា នាយសេនាធិការការពារជាតិនៃកងកម្លាំងប្រដាប់អាវុធឥណ្ឌាលោក Anil Chauhan បានបញ្ជាក់ថា ឥណ្ឌាបានបាត់បង់យន្តហោះចម្បាំងមិនជាក់លាក់មួយចំនួន នៅក្នុងការប៉ះទង្គិចជាមួយប៉ាគីស្ថាន កាលពីខែមុន។

ចាប់តាំងពីពេលនោះមក ប្រទេសទាំងពីរបានស្វែងរកការពង្រឹងសមត្ថភាពការពាររបស់ពួកគេ និងទិញអាវុធចុងក្រោយបង្អស់ ខណៈដែលភាពតានតឹង នៅតែបន្តកើតមានរវាងប្រទេសទាំងពីរ។ រដ្ឋាភិបាលប៉ាគីស្ថានបាននិយាយនៅក្នុងការបង្ហោះប្រព័ន្ធផ្សព្វផ្សាយសង្គម កាលពីថ្ងៃទី០៧ ខែមិថុនាថា ប្រទេសចិនក៏បានយល់ព្រមក្នុងការលក់យន្តហោះ KJ-500 និងយន្តហោះ ក៏ដូចជាប្រព័ន្ធការពារមីស៊ីលបាលីស្ទីក HQ-19 ឲ្យប្រទេសប៉ាគីស្ថានផងដែរ។