អភិបាលក្រុង Los Angeles លោកស្រី Karen Bass បានប្រកាសបម្រាមគោចរសម្រាប់ផ្នែកតូចមួយនៃទីក្រុង Los Angeles ស្របពេលការតវ៉ាប្រឆាំងការបង្រ្កាបជនអន្តោប្រវេសន៍របស់លោក Donald Trump កំពុងរីករាលដាលពាសពេញសហរដ្ឋអាមេរិក។  

លោកស្រី Bass បាននិយាយក្នុងសន្និសីទសារព័ត៌មានមួយថា បម្រាមគោចរនោះ នឹងអនុវត្តលើផ្ទៃដី២,៦គីឡូម៉ែត្រ និងចូលជាធរមានចាប់ពីម៉ោង៨យប់ថ្ងៃអង្គារ ដល់ម៉ោង៦ព្រឹកថ្ងៃពុធសប្ដាហ៍នេះ ម៉ោងនៅសហរដ្ឋអាមេរិក។  

លោកស្រី Bass បាននិយាយថា ឥឡូវនេះអាជីវកម្មជាច្រើនបានរងផលប៉ះពាល់ ឬត្រូវបានបំផ្លិចបំផ្លាញកាលពីយប់ថ្ងៃអង្គារ ដោយមានអាជីវកម្មចំនួន ២៣ កន្លែងត្រូវបានលួច ហើយលោកស្រីគិតថា ប្រសិនបើអ្នកបើកបរឆ្លងកាត់ទីក្រុង Los Angeles នោះផ្ទាំងគំនូរមិនល្អមានគ្រប់ទីកន្លែង ហើយបានបង្កការខូចខាតយ៉ាងធ្ងន់ធ្ងរដល់អាជីវកម្ម និងទ្រព្យសម្បត្តិមួយចំនួន។

ដូច្នេះសាររបស់លោកស្រីទៅកាន់អ្នករាល់គ្នាគឺ ប្រសិនបើអ្នកមិនរស់នៅ ឬធ្វើការនៅក្នុងទីក្រុងនេះទេ គួរជៀសវាងកុំទៅកាន់តំបន់នោះ។ ក្រុមមន្ត្រីអនុវត្តច្បាប់ នឹងចាប់ខ្លួនបុគ្គលដែលបំពានបម្រាមគោចរ ហើយអ្នកនឹងត្រូវកាត់ទោស។

អភិបាលក្រុងរូបនេះ បានបន្តថា លោកស្រីរំពឹងថាបម្រាមគោចរនឹងនៅតែជាធរមានរយៈពេលជាច្រើនថ្ងៃ ៕