ប្រធានាធិបតីអាមេរិក លោក Donald Trump បានប្រើសុន្ទរកថាគោរពដល់ទាហានកាលពីថ្ងៃអង្គារ (១០ មិថុនា) ដើម្បីការពារការសម្រេចចិត្តដ៏ចម្រូងចម្រាសរបស់លោក ក្នុងការដាក់ពង្រាយទាហានទៅកាន់បាតុកម្មទីក្រុង Los Angeles ប្រឆាំងគោលនយោបាយអន្តោប្រវេសន៍របស់លោក នៅក្នុងទង្វើមួយដែលក្រុមអ្នករិះគន់បានចាត់ទុកថាជាប្រតិកម្មជ្រុលហួសហេតុ និងមានហេតុផលនយោបាយ។

លោក Trump បានប្រាប់ទាហាននៅឯមូលដ្ឋានកងទ័ព Fort Bragg នៃរដ្ឋ North Carolina ថា "គ្រប់ជំនាន់នៃវីរបុរសកងទ័ព មិនបានតស៊ូបង្ហូរឈាមរបស់ពួកគេនៅច្រាំងទន្លេឆ្ងាយៗដើម្បីមកឈរមើលប្រទេសរងការបំផ្លាញដោយការឈ្លានពាន និងភាពគ្មានច្បាប់នៃពិភពទីបីនោះទេ"។

លោក Trump បន្តថា "អ្វីដែលកំពុងកើតឡើងនៅរដ្ឋ California គឺជាការវាយប្រហារយ៉ាងពេញទំហឹងទៅលើសន្តិភាព សណ្តាប់ធ្នាប់សាធារណៈ និងលើអធិបតេយ្យភាពជាតិ ដែលធ្វើឡើងដោយពួកកុបកម្មកាន់ទង់ជាតិបរទេស" ដោយបន្ថែមថា រដ្ឋបាលរបស់លោកនឹង "រំដោះទីក្រុង Los Angeles"។

ដំណើរទស្សនកិច្ចរបស់លោក Trump ទៅកាន់មូលដ្ឋាន Fort Bragg ដែលជាជម្រករបស់ទាហានសកម្មចំនួន ៥០.០០០នាក់នេះ បានកើតឡើង បន្ទាប់ពីលោកដាក់ពង្រាយកងម៉ារីនចំនួន ៧០០នាក់ និងកងទ័ពឆ្មាំជាតិចំនួន ៤.០០០នាក់ទៅកាន់ទីក្រុង Los Angeles ក្នុងការឆ្លើយតបមិនបន្ធូរដៃ ទៅនឹងការតវ៉ាដ៏តានតឹងតាមដងផ្លូវ ជុំវិញគោលនយោបាយអន្តោប្រវេសន៍របស់លោក។ ប្រធានាធិបតីមកពីបក្សសាធារណរដ្ឋរូបនេះនិយាយថា ការដាក់ពង្រាយយោធាគឺចាំបាច់ដើម្បីការពារទ្រព្យសម្បត្តិសហព័ន្ធ និងបុគ្គលិក៕