មន្ត្រីអនុវត្តច្បាប់អន្តោប្រវេសន៍ និងគយរបស់សហរដ្ឋអាមេរិក ហៅកាត់ថាទីភ្នាក់ងារ ICE បាននិងកំពុងបង្កើនកិច្ចខិតខំប្រឹងប្រែងរបស់ខ្លួនយ៉ាងខ្លាំងក្នុងប៉ុន្មានសប្តាហ៍ថ្មីៗនេះលើការចាប់ខ្លួនជនអន្តោប្រវេសន៍ ដើម្បីបំពេញការសន្យារបស់ប្រធានាធិបតីមកពីបក្សសាធារណរដ្ឋ លោក Donald Trump អំពីការនិរទេសក្នុងកម្រិតកំណត់ត្រា នៅក្នុងជំហានមួយដែលរងការរិះគន់ប្រឆាំងយ៉ាងខ្លាំង។

ប្រភពជាច្រើនបានប្រាប់សារព័ត៌មានរ៉យទ័រថា សេតវិមានបានទាមទារឱ្យទីភ្នាក់ងារ ICE បង្កើនគោលដៅចាប់ខ្លួនជនអន្តោប្រវេសន៍ ដែលរស់នៅក្នុងសហរដ្ឋអាមេរិក ដោយខុសច្បាប់។ នោះមានន័យថា ការផ្លាស់ប្តូរយុទ្ធសាស្ត្រដើម្បីសម្រេចបានកូតាដ៏ខ្ពស់នៃការចាប់ខ្លួនបែបនេះត្រូវបង្កើនបីដងដល់តួលេខ ៣.០០០នាក់ ក្នុងមួយថ្ងៃ ដែលលើសពីគោលដៅពីមុន ១.០០០នាក់ក្នុងមួយថ្ងៃ។

សមាជិកសហគមន៍ និងអ្នកមកពីបក្សប្រជាធិបតេយ្យ បានរុញច្រានប្រឆាំងនឹងជំហាននោះ ដោយលើកហេតុផលថា មន្រ្តី ICE កំពុងកំណត់គោលដៅលើមនុស្សដោយមិនរើសមុខ និងបង្កឱ្យមានការភ័យខ្លាច។ ភាពតានតឹងក៏បានផ្ទុះឡើងប្រឆាំងនឹងរឿងនេះផងដែរនៅក្នុងទីក្រុង Los Angeles កាលពីចុងសប្តាហ៍ នៅពេលក្រុមអ្នកតវ៉ាចេញដើរតាមដងផ្លូវ បន្ទាប់ពី ICE បានចាប់ខ្លួនជនអន្តោប្រវេសន៍រាប់សិបនាក់នៅទីក្រុងនោះ នេះបើយោងតាមអ្នកតស៊ូមតិជនអន្តោប្រវេសន៍។

លោក Tom Homan ដែលជាមន្ត្រីព្រំដែនរបស់លោក Trump បានប្រាប់រ៉យទ័រកាលពីចុងខែឧសភាថា រដ្ឋបាលថ្មីបាននិរទេសមនុស្សប្រហែល ២០០.០០០នាក់ ក្នុងរយៈពេល ៤ខែកន្លងទៅនោះ៕