កងកម្លាំងរុស្ស៊ី បានបើកការវាយប្រហារដោយយានដ្រូនរយៈពេលប្រាំម៉ោងដ៏បំផ្លិចបំផ្លាញលើទីក្រុង គីវ(Kyiv)កាលពីថ្ងៃអង្គារសប្ដាហ៍នេះក្នុងការវាយប្រហារទ្រង់ទ្រាយដ៏ធំបំផុតមួយ ក្នុងការចំណោមការវាយប្រហារធំៗជាច្រើននាពេលថ្មីៗនេះលើរដ្ឋធានីនេះ ខណៈគ្មានសញ្ញាបញ្ចប់សង្រ្គាម។

ក្រុមមន្ត្រីក្នុងតំបន់បាននិយាយនៅថ្ងៃពុធ១១ មិថុនាសប្ដាហ៍នេះ ថាការវាយប្រហារដោយយានដ្រូន របស់រុស្ស៊ីរយៈពេល ៩ នាទីទៅលើទីក្រុងធំទីពីររបស់អ៊ុយក្រែនគឺ Kharkiv បានសម្លាប់មនុស្សយ៉ាងហោចណាស់ ២ នាក់ និង៣៨នាក់របួសក់ក្នុងនោះមានកុមារ ៥ នាក់ផងដែរ។

លោកប្រធានាធិបតី Volodymyr Zelensky បាននិយាយថា កងកម្លាំងរបស់ទីក្រុងមូស្គូបានបាញ់ យានដ្រូន ៣១៥ គ្រឿងស្រោចលើអ៊ុយក្រែនពេញមួយយប់ ដោយបានសម្លាប់មនុស្សសរុប ៧ នាក់ ។

អភិបាលក្រុង Kyiv លោក Vitalii Klitschko បាននិយាយថា មនុស្សបួននាក់បានរងរបួសក្នុងការវាយប្រហារលើរដ្ឋធានី ដែលបានបង្កឱ្យមានភ្លើងឆេះពេញរដ្ឋធានីនេះ។

ក្នុងសេចក្តីថ្លែងការណ៍មួយបង្ហោះលើ Telegram លោក Zelensky បាននិយាយថា ជារៀងរាល់យប់ ជំនួសឱ្យបទឈប់បាញ់ មានការវាយប្រហារដ៏ធំពីយានដ្រូន Shaheds មីស៊ីលតម្រង់គោលដៅ និងគ្រាប់ផ្លោង។ ថ្ងៃនេះជាការវាយប្រហារដ៏ធំបំផុតមួយ ក្នុងចំណោមការវាយប្រហារធំៗបំផុតជាច្រើនលើទីក្រុង Kyiv។ តំបន់ Odesa តំបន់ Dnipro និងតំបន់ Chernihiv ក៏ត្រូវបានកំណត់គោលដៅផងដែរ។ការវាយប្រហារនេះបានកើតឡើងមួយថ្ងៃបន្ទាប់ពីទីក្រុងមូស្គូបានបាញ់បង្ហោះយានដ្រូនជិត៥០០ គ្រឿងលើអ៊ុយក្រែន ក្នុងការទម្លាក់គ្រាប់បែកដ៏ធំបំផុតក្នុងពេលមួយយប់ក្នុងសង្គ្រាមរយៈពេលបីឆ្នាំជាងមកនេះ។

ទីក្រុង Kyiv បានឆ្លើយតបដ៏ខ្លាំងក្លាដោយការវាយប្រហារលើមូលដ្ឋានប្រតិបត្តិការកងទ័ពអាកាសនិង យន្តហោះរបស់រុស្ស៊ីកាលពីថ្ងៃទី ១ ខែមិថុនាកន្លងទៅបណ្ដាលឲ្យខូចខាតជាច្រើន៕