រដ្ឋាភិបាលវៀតណាម បានណែនាំដល់ក្រសួង និងមូលដ្ឋាន ឱ្យជម្លៀសប្រជាជនជាមុនចេញពីតំបន់ហានិភ័យខ្ពស់នៃបំណាក់ដី ទឹកជំនន់យ៉ាងគំហុក និងជ្រៅ ដើម្បីឆ្លើយតបទៅនឹងវិសម្ពាធត្រូពិក ដែលអាចនឹងកើនឡើងក្លាយជាព្យុះ។

មជ្ឈមណ្ឌលជាតិសម្រាប់ការព្យាករធនធានជលសាស្ត្រ បាននិយាយថា គិតត្រឹមម៉ោង ១រសៀលនៅថ្ងៃទី ១០ ខែមិថុនា ចំណុចកណ្តាលនៃវិសម្ពាធត្រូពិក មានទីតាំងនៅរយៈទទឹង ១៥,៣ដឺក្រេភាគខាងជើង និងរយៈបណ្តោយ ១១៤,៨ដឺក្រេ ភាគខាងកើត ប្រហែល ៣៦០គីឡូម៉ែត្រ ភាគអាគ្នេយ៍នៃកោះ Hoang Sa (ឬ Paracel) ។ ល្បឿនខ្យល់នៅជិតចំណុចកណ្តាលមានចាប់ពី ៣៩ ដល់ ៤៩គីឡូម៉ែត្រក្នុងមួយម៉ោង (កម្រិត ៦-៧) ជាមួយនឹងខ្យល់កន្រ្តាក់រហូតដល់ ៧៥គីឡូម៉ែត្រក្នុងមួយម៉ោង (កម្រិតទី៩) ដោយរំកិលបន្តិចម្តងៗទៅភាគពាយព្យ ក្នុងល្បឿនប្រហែល ៥គីឡូម៉ែត្រក្នុងមួយម៉ោង។

វិសម្ពាធនេះត្រូវបានព្យាករថានឹងពង្រឹងទៅជាព្យុះ នៅថ្ងៃទី១១ ខែមិថុនា នេះ។ ចាប់ពីយប់ថ្ងៃទី១១ ខែមិថុនា តទៅ ខេត្ត Quang Binh ដល់ Quang Ngai អាចនឹងមានភ្លៀងធ្លាក់ខ្លាំងពី ១០០ ទៅ ៣០០មីលីម៉ែត្រ ដោយតំបន់ខ្លះមានលើសពី ៤៥០មីលីម៉ែត្រ។ តំបន់ខ្ពង់រាបភាគកណ្ដាល ប៉ែកខាងជើង អាចទទួលបានភ្លៀងពី ៧០ ទៅ ១៥០មីលីម៉ែត្រ ជាមួយនឹងភ្លៀងធ្លាក់ក្នុងតំបន់អាចលើសពី ២០០មីលីម៉ែត្រ ក្នុងរយៈពេល ៦ម៉ោង។

ដើម្បីត្រៀមទប់ទល់នឹងអាកាសធាតុធ្ងន់ធ្ងរ និងជំនន់ទឹកភ្លៀង នាយករដ្ឋមន្ត្រីបានណែនាំថ្នាក់ដឹកនាំខេត្ត ឱ្យតាមដានការព្យាករឱ្យដិតដល់ ធានាសុវត្ថិភាពនាវាទាំងអស់នៅសមុទ្រ រួមទាំងទូកទេសចរណ៍ផងដែរ និងជម្លៀសប្រជាជនចេញពីតំបន់ដែលមានហានិភ័យខ្ពស់ ទៅកាន់ទីតាំងមានសុវត្ថិភាព។ វិធានការបុរេសកម្មក៏ត្រូវតែធ្វើឡើងសម្រាប់ហេដ្ឋារចនាសម្ព័ន្ធងាយរងគ្រោះ គម្រោងសាងសង់ដែលកំពុងដំណើរការ តំបន់ឧស្សាហកម្ម តំបន់លំនៅដ្ឋាន និងប្រតិបត្តិការកសិកម្មនៅក្នុងតំបន់ទំនាប៕