ក្រុមអ្នកជំនាញរបស់អង្គការសហប្រជាជាតិ បាននិយាយនៅក្នុងរបាយការណ៍មួយកាលពីថ្ងៃអង្គារ (១០ មិថុនា) ថា អ៊ីស្រាអែល បានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិនៃ "ការសម្លាប់រង្គាល" ដោយការកាប់សម្លាប់ជនស៊ីវិលដែលស្នាក់នៅក្នុងសាលារៀន និងកន្លែងសាសនាផ្សេងទៀតនៅដែនដីហ្កាហ្សា ដែលជាផ្នែកនៃ "យុទ្ធនាការប្រមូលផ្តុំដើម្បីលុបបំបាត់ជីវិតប៉ាឡេស្ទីន"។

គណៈកម្មការស៊ើបអង្កេតអន្តរជាតិឯករាជ្យ របស់អង្គការសហប្រជាជាតិ ស្តីពីទឹកដីប៉ាឡេស្ទីនដែលកាន់កាប់ រួមទាំងក្រុងហ្សេរុយសាឡិមខាងកើត និងអ៊ីស្រាអែល គ្រោងនឹងបង្ហាញរបាយការណ៍នេះទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិដែលមានមូលដ្ឋាននៅទីក្រុងហ្សឺណែវ នៅថ្ងៃទី ១៧ ខែមិថុនា ខាងមុខ។

អតីតឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោកស្រី Navi Pillay ដែលជាប្រធានគណៈកម្មការនេះ បាននិយាយក្នុងសេចក្តីថ្លែងការណ៍មួយថា "មានការចង្អុលបង្ហាញកាន់តែច្រើនឡើងថា អ៊ីស្រាអែលកំពុងអនុវត្តយុទ្ធនាការប្រមូលផ្ដុំមួយដើម្បីលុបបំបាត់ជីវិតជនជាតិប៉ាឡេស្ទីន នៅក្នុងតំបន់ហ្កាហ្សា"។ គណៈកម្មាការនេះបានពិនិត្យមើលលើការវាយប្រហារលើកន្លែងអប់រំ និងកន្លែងសាសនា និងវប្បធម៌ ដើម្បីវាយតម្លៃថា តើច្បាប់អន្តរជាតិត្រូវបានបំពាន ឬយ៉ាងណា។

អ៊ីស្រាអែល ដកខ្លួនចេញពីក្រុមប្រឹក្សាសិទ្ធិមនុស្សកាលពីខែកុម្ភៈ ដោយចោទថាក្រុមនោះមានភាពលម្អៀង។ បេសកកម្មការទូតរបស់ខ្លួន បាននិយាយថា របាយការណ៍ចុងក្រោយរបស់គណៈកម្មការនេះគឺ "ជាការប៉ុនប៉ងដើម្បីផ្សព្វផ្សាយការនិទានរឿងប្រឌិតរបស់ខ្លួនអំពីសង្រ្គាមហ្កាហ្សា" ហើយបានបង្ហាញថា សមាជិករបស់ខ្លួន "យកចិត្តទុកដាក់ខ្លាំងលើការវាយប្រហារអ៊ីស្រាអែល ជាជាងការការពារប្រជាជននៅហ្កាហ្សា"៕