សកម្មជនជនជាតិស៊ុយអែត នាង Greta Thunberg កាលពីថ្ងៃអង្គារ ទី១០ មិថុនា បានចោទអ៊ីស្រាអែលថាបាន «ចាប់ជំរិត នៅក្នុងដែនទឹកអន្តរជាតិ ហើយឲ្យយើងប្រឆាំងឆន្ទៈរបស់យើងចំពោះអ៊ីស្រាអែល» បន្ទាប់ពីកងកម្លាំងសន្តិសុខបានស្ទាក់ចាប់ទូកដែលកំពុងដឹកជំនួយមនុស្សធម៌ទៅកាន់តំបន់ហ្កាហ្សា។

នាង Thunberg អាយុ២២ ឆ្នាំ បានប្រាប់អ្នកសារព័ត៌មាននៅពេលទៅដល់អាកាសយានដ្ឋាន Charles de Gaulle ក្នុងទីក្រុងប៉ារីស ថា «នេះគឺជាការរំលោភបំពានលើសិទ្ធដោយចេតនាមួយផ្សេងទៀត ដែលត្រូវបានបន្ថែមទៅក្នុងបញ្ជីនៃការរំលោភបំពានរាប់មិនអស់ ដែលអ៊ីស្រាអែលកំពុងប្រព្រឹត្ត»។

នាង បានសង្កត់ធ្ងន់ថា បទពិសោធន៍ផ្ទាល់ខ្លួនរបស់នាងគឺ «គ្មានអ្វីប្រៀបធៀបបានទៅនឹងអ្វីដែលពលរដ្ឋប៉ាឡេស្ទីនកំពុងឆ្លងកាត់នោះទេ» ក្នុងចំណោមមនុស្ស១២នាក់នៅលើទូក Madleen ដែលដឹកស្បៀងអាហារ និងគ្រឿងផ្គត់ផ្គង់សម្រាប់តំបន់ហ្កាហ្សា សកម្មជនជនជាតិបារាំង៥នាក់ត្រូវបាននាំខ្លួនទៅកាន់មន្ទីរឃុំឃាំង បន្ទាប់ពីពួកគេ បានបដិសេធមិនព្រមចាកចេញពីអ៊ីស្រាអែល ដោយស្ម័គ្រចិត្ត។

ប៉ុន្តែនាង Thunberg ដែលល្បីល្បាញជាសកម្មជនសិស្សសាលាប្រឆាំងបម្រែបម្រួលអាកាសធាតុ និងព្យាយាមជៀសវាងការជិះយន្តហោះ ដោយសារតែផលប៉ះពាល់បរិស្ថាន ត្រូវបាននិរទេសដោយអ៊ីស្រាអែល តាមជើងហោះហើរពាណិជ្ជកម្មរបស់ក្រុមហ៊ុនអាកាសចរណ៍ជាតិ El Al ឆ្ពោះទៅកាន់ទីក្រុងប៉ារីស។

នាង Thunberg បាននិយាយថា «នេះពុំមែនជារឿងពិតនោះទេ។ រឿងពិត គឺមានការប្រល័យពូជសាសន៍នៅហ្កាហ្សា និងភាពអត់ឃ្លានជាប្រព័ន្ធ»។ ក្រុមសិទ្ធិមនុស្សជាច្រើន រួមទាំងអង្គការលើកលែងទោសអន្តរជាតិ បានចោទប្រកាន់អ៊ីស្រាអែលពីបទប្រល័យពូជសាសន៍ប្រឆាំងពលរដ្ឋប៉ាឡេស្ទីននៅក្នុងតំបន់ហ្កាហ្សា ប៉ុន្តែអ៊ីស្រាអែល បានច្រានចោលទាំងស្រុងនូវការចោទប្រកាន់ទាំងនេះ។