ប្រទេសប៉ាគីស្ថាន បានដំឡើងការចំណាយលើវិស័យការពារជាតិចំនួន ២០ភាគរយ បន្ទាប់ពីជម្លោះដ៏សាហាវជាមួយឥណ្ឌា កាលពីខែមុន។

រដ្ឋាភិបាលរបស់លោកនាយករដ្ឋមន្រ្តី Shehbaz Sharif បានប្រកាសពីការកើនឡើងនេះ កាលពីថ្ងៃអង្គារដែលជាផ្នែកមួយនៃថវិកាសម្រាប់ឆ្នាំសារពើពន្ធ ២០២៥-២៦ ដែលក្នុងនោះការចំណាយទូទៅ នឹងត្រូវបានកាត់បន្ថយ ៧ភាគរយ រហូតដល់ ១៧.៥៧ ពាន់ពាន់លានរូពី (៦២ ពាន់លានដុល្លារ)។

ប្រទេសប៉ាគីស្ថាន និងឥណ្ឌា ត្រូវបានរុញច្រានចូលទៅក្នុងមាត់ជ្រោះនៃសង្រ្គាម កាលពីដើមឆ្នាំនេះ បន្ទាប់ពីការសម្លាប់រង្គាលដោយកាំភ្លើងនូវភ្ញៀវទេសចរ នៅក្នុងតំបន់កាស្មៀរដែលគ្រប់គ្រងដោយឥណ្ឌា ដែលជាឧបសគ្គដ៏ធំបំផុត នៅក្នុងទំនាក់ទំនងរវាងពួកគេ ចាប់តាំងពីឆ្នាំ ២០១៩។

ភាពតានតឹងជាច្រើនសប្តាហ៍ បានកើតមានឡើង ដោយជំរុញឲ្យមានការវាយប្រហារដោយមីស៊ីល និងយានដ្រូនដែលបានបណ្តាលឲ្យមានមនុស្សស្លាប់រាប់សិបនាក់ នៅសងខាងព្រំដែន។

រដ្ឋមន្ត្រីហិរញ្ញវត្ថុលោក Muhammad Aurangzeb បាននិយាយថា រដ្ឋាភិបាលកំពុងបែងចែកថវិកាចំនួន២,៥៥ សែនកោដិរូពី (៩ពាន់លានដុល្លារ) សម្រាប់វិស័យការពារជាតិ បើធៀបនឹង២,១២ សែនកោដិរូពីក្នុងថវិកាមុន។

គួរបញ្ជាក់ផងដែរ ក្នុងខែកុម្ភៈ ប្រទេសឥណ្ឌា បានបង្កើនការចំណាយលើវិស័យការពារជាតិរបស់ខ្លួនចំនួន ៩,៥ ភាគរយ។