បេសកជនអង្គការសហប្រជាជាតិ បានព្រមានកាលពីថ្ងៃអង្គារថា ប្រទេសមីយ៉ាន់ម៉ា កំពុងស្ថិតនៅលើ «ផ្លូវឆ្ពោះទៅរកការបំផ្លិចបំផ្លាញដោយខ្លួនឯង» ប្រសិនបើអំពើហិង្សាក្នុងប្រទេសអាស៊ីអាគ្នេយ៍ ដែលទទួលរងនូវជម្លោះមិនបានបញ្ចប់នេះ។

លោកស្រី Julie Bishop បានប្រាប់មហាសន្និបាតអង្គការសហប្រជាជាតិថា៖«ពិតជាគួរឲ្យព្រួយបារម្ភ» អំពើហិង្សាមិនបានបញ្ចប់ បន្ទាប់ពីការរញ្ជួយដីដ៏ខ្លាំងមួយកាលពីចុងខែមីនា បានបំផ្លិចបំផ្លាញផ្នែកខ្លះនៃរដ្ឋធានីណៃពិដោ (Naypyitaw) និងទីក្រុងធំបំផុតទីពីររបស់ប្រទេសនេះគឺ Mandalay ដោយបានសម្លាប់មនុស្សជាង ៣.000នាក់ និងរបួសរាប់ពាន់នាក់ទៀត។

លោកស្រី Bishop អតីតរដ្ឋមន្ត្រីការបរទេសអូស្ត្រាលី បាននិយាយថា បទឈប់បាញ់ដែលប្រកាសដោយភាគីមួយចំនួន មិនត្រូវបានគេសង្កេតឃើញឲ្យបានទូលំទូលាយនោះ «បានបង្កប់វិបត្តិមួយ នៅក្នុងវិបត្តិមួយ» ហើយប្រជាជនក្នុងប្រទេសមីយ៉ាន់ម៉ាឥឡូវនេះ ត្រូវតែដោះស្រាយជម្លោះដ៏ខ្លាំងក្លា និងការបំផ្លិចបំផ្លាញដោយសារគ្រោះរញ្ជួយដីនោះ។

លោកស្រី បានបន្តថា៖«វិធីសាស្រ្ដឈ្នះ-ចាញ់ នៅតែមាននៅគ្រប់ភាគី។ «ការប៉ះទង្គិចគ្នាដោយអាវុធ នៅតែជាឧបសគ្គ ក្នុងការបំពេញតម្រូវការមនុស្សធម៌។ លំហូរនៃអាវុធចូលទៅក្នុងប្រទេសនេះ កំពុងជំរុញឲ្យមានការរំពឹងទុកថា ដំណោះស្រាយយោធា អាចធ្វើទៅបាន» ។

ការតស៊ូប្រដាប់អាវុធយ៉ាងស្វិតស្វាញប្រឆាំងនឹងការគ្រប់គ្រងដោយយោធា នៅក្នុងប្រទេសមីយ៉ាន់ម៉ា បានចាប់ផ្តើម នៅក្នុងខែកុម្ភៈឆ្នាំ ២០២១ បន្ទាប់ពីក្រុមឧត្តមសេនីយ៍ បានដណ្តើមអំណាចពីរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី (Aung San Suu Kyi)។ ជនស៊ីវិលជាង ៦.៦០០នាក់ ត្រូវបានប៉ាន់ប្រមាណថា ត្រូវបានសម្លាប់ដោយកងកម្លាំងសន្តិសុខ។ នេះបើយោងតាមតួលេខដែលចងក្រងដោយអង្គការមិនមែនរដ្ឋាភិបាល។