ឆ្លើយតបទៅនឹងសំណើសុំការអត្ថាធិប្បាយលើការអះអាងរបស់រដ្ឋមន្ត្រីការពារជាតិអាមេរិក លោក Pete Hegseth នៅឯកិច្ចសន្ទនា Shangri-La ដែលថាការប៉ុនប៉ងណាមួយដោយចិនដើម្បី "ក្រសោបយកកោះតៃវ៉ាន់ដោយកម្លាំង" នឹងនាំឱ្យមានផលវិបាកដ៏អាក្រក់សម្រាប់ឥណ្ឌូ-ប៉ាស៊ីហ្វិក និងពិភពលោក លោកស្រី Zhu Fenglian អ្នកនាំពាក្យការិយាល័យកិច្ចការកោះតៃវ៉ាន់នៃក្រុមប្រឹក្សារដ្ឋ បាននិយាយនៅថ្ងៃពុធ (១១ មិថុនា) នេះថា អ្នកមួយចំនួននៅសហរដ្ឋអាមេរិក បន្តនិយាយបំផ្លើសនូវអ្វីដែលគេហៅថា "ការគំរាមកំហែងរបស់ចិន"។

លោកស្រី Zhu បន្តថា ពួកគេកំពុងបំផ្លើសភាពតានតឹងនៅទូទាំងច្រកសមុទ្រតៃវ៉ាន់ ដែលជាលេសប្រើដើម្បីជ្រៀតជ្រែកក្នុងបញ្ហាតំបន់តៃវ៉ាន់ និងបម្រើផលប្រយោជន៍នយោបាយផ្ទាល់ខ្លួនរបស់សហរដ្ឋអាមេរិក ហើយប្រទេសចិន ប្រឆាំងយ៉ាងម៉ឺងម៉ាត់ចំពោះការអះអាងបែបនេះ។

លោកស្រី Zhu បន្ថែមថា បញ្ហាកោះតៃវ៉ាន់ គឺជាកិច្ចការផ្ទៃក្នុងរបស់ចិន សុទ្ធសាធ ហើយពុំត្រូវមានការជ្រៀតជ្រែកពីខាងក្រៅឡើយ។ អ្នកនាំពាក្យរូបនេះសង្កត់ធ្ងន់ថា ភាគីអាមេរិក គួរតែប្រកាន់ខ្ជាប់នូវគោលការណ៍ចិនតែមួយ និងបទប្បញ្ញត្តិនៃសេចក្តីថ្លែងការណ៍រួមអាមេរិក-ចិន បញ្ឈប់ការបញ្ជូនសញ្ញាខុសដល់កងកម្លាំងផ្ដាច់ខ្លួន "ឯករាជ្យកោះតៃវ៉ាន់" និងបញ្ឈប់ការដុតបញ្ឆេះភាពតានតឹងនៅក្នុងតំបន់។

ថ្លែងនៅក្នុងកិច្ចសន្ទនា Shangri-la នៅសិង្ហបុរី កាលពីដើមខែមិថុនា លោក Hegseth បានព្រមានថា ចិននឹងបង្កការគំរាមកំហែងដល់កោះតៃវ៉ាន់ ខណៈជំរុញឱ្យប្រទេសអាស៊ីបង្កើនការចំណាយលើវិស័យការពារជាតិ និងធ្វើការជាមួយអាមេរិកដើម្បីរារាំងសង្គ្រាម។ ជាការឆ្លើយតប ចិនបានចោទអាមេរិក ថាជាអ្នកបង្កបញ្ហាដ៏ធំបំផុតសម្រាប់សន្តិភាពក្នុងតំបន់៕