ក្រុមហាម៉ាស បានសម្លាប់យុទ្ធជន ៥០នាក់ ក្នុងប៉ុន្មានខែថ្មីៗនេះ ពីក្រុមជនអន្ធពាលប៉ាឡេស្ទីនមួយ ដែលអ៊ីស្រាអែល បានបំពាក់អាវុធនៅក្នុងតំបន់ហ្កាហ្សា នេះបើយោងតាមសេចក្តីថ្លែងការណ៍មួយ ដែលចេញផ្សាយស្របពេលមានរបាយការណ៍ថា ទាហានអ៊ីស្រាអែល បានធ្វើអន្តរាគមន៍ដោយផ្ទាល់នៅក្នុងសប្តាហ៍នេះដើម្បីការពារក្រុមបក្សពួកទាំងនោះ។

របាយការណ៍ប្រព័ន្ធផ្សព្វផ្សាយអ៊ីស្រាអែលបានឱ្យដឹងថា ការប៉ះទង្គិចរវាងក្រុមយុទ្ធជនហាម៉ាស និងសមាជិកនៃកងជីវពលដឹកនាំដោយបុរសម្នាក់ឈ្មោះ Yasser abu Shabab ដែលល្បីឈ្មោះដោយសារការចូលរួមរបស់លោកក្នុងសកម្មភាពឧក្រិដ្ឋកម្ម បានផ្ទុះឡើងកាលពីព្រឹកថ្ងៃអង្គារ (១០ មិថុនា) នៅទីក្រុងភាគខាងត្បូង Rafah។

បណ្តាញព័ត៌មានអ៊ីស្រាអែល i24 រាយការណ៍ថា ទាហានអ៊ីស្រាអែល បានប៉ះទង្គិចជាមួយសមាជិកហាម៉ាស ដើម្បីការពារក្រុម Abu Shabab មិនឱ្យត្រូវសម្លាប់ ដែលបណ្តាលឱ្យមានការស្លាប់ទាំងសងខាង។ ក្រុមមន្ត្រីការពារជាតិអ៊ីស្រាអែល បានទទួលស្គាល់កាលពីសប្តាហ៍មុនថា ពួកគេបានបំពាក់អាវុធដល់ក្រុមនេះ ក្នុងបំណងបំផ្លាញក្រុមហាម៉ាស។

កាលពីថ្ងៃអង្គារ ក្នុងសេចក្តីថ្លែងការណ៍ដ៏វែងមួយដែលចេញផ្សាយទៅកាន់សារព័ត៌មាន កងជីវពលរបស់លោក Abu Shabab ឈ្មោះថា សេវាប្រឆាំងភេរវកម្ម ឬកងកម្លាំងប្រជាប្រិយ បាននិយាយថា “ក្រុមហាម៉ាស បានសម្លាប់អ្នកស្ម័គ្រចិត្តរបស់ពួកគេជាង ៥០នាក់ រួមទាំងសាច់ញាតិរបស់មេដឹកនាំក្រុមនេះផងដែរ"៕