អង្គការទេសន្តរប្រវេសន៍អន្តរជាតិ(IOM) កាលពីថ្ងៃអង្គារ បាននិយាយថា ជនអន្តោប្រវេសន៍ចំនួន៤១៤ នាក់ត្រូវបានស្ទាក់ចាប់នៅឆ្នេរសមុទ្រប្រទេសលីប៊ី កាលពីសប្តាហ៍មុននេះ។ អង្គការទេសន្តរប្រវេសន៍អន្តរជាតិ(IOM) បាននិយាយនៅក្នុងសេចក្តីថ្លែងការណ៍ថា «ចាប់តាំងពីថ្ងៃទី១ ដល់ថ្ងៃទី៧ ខែមិថុនា ឆ្នាំ២០២៥ ជនអន្តោប្រវេសន៍៤១៤នាក់ត្រូវបានស្ទាក់ចាប់ ហើយបញ្ជូនត្រឡប់ទៅកាន់ប្រទេសលីប៊ីវិញ»។

ជនអន្តោប្រវេសន៍រួមមានស្ត្រី១២នាក់ និងកុមារ៩នាក់ ខណៈសាកសពជនអន្តោប្រវេសន៍៣នាក់ ត្រូវបានរកឃើញ។

អង្គការទេសន្តរប្រវេសន៍អន្តរជាតិ(IOM) និយាយថា រហូតមកដល់ពេលនេះក្នុងឆ្នាំនេះ ជនអន្តោប្រវេសន៍សរុបចំនួន ៩.៩៩៩នាក់ រួមមានទាំងស្ត្រី និងកុមារ ត្រូវបានស្ទាក់ចាប់នៅសមុទ្រ ហើយត្រូវបាននាំត្រឡប់ទៅប្រទេសលីប៊ីវិញ ខណៈជនអន្តោប្រវេសន៍២៣៤នាក់បានស្លាប់នៅសមុទ្រ និង២២៦នាក់ផ្សេងទៀត បានបាត់ខ្លួននៅតាមផ្លូវនៅសមុទ្រមេឌីទែរ៉ាណេភាគកណ្តាល។

ចាប់តាំងពីការដួលរលំនៃអតីតមេដឹកនាំ លោក Muammar Gaddafi ក្នុងឆ្នាំ២០១១ ភាពអសន្តិសុខ និងភាពវឹកវរជាបន្តបន្ទាប់នៅក្នុងប្រទេសលីប៊ី បានជំរុញឱ្យមានជនអន្តោប្រវេសន៍ជាច្រើន ភាគច្រើនជាជនជាតិអាហ្វ្រិក ដែលប៉ុនប៉ងឆ្លងកាត់សមុទ្រមេឌីទែរ៉ាណេ ដើម្បីបានទៅដល់អឺរ៉ុប។