ក្នុងអំឡុងពេលកិច្ចពិភាក្សានៅទីក្រុងអាម៉ាន ( Amman) កាលពីថ្ងៃអង្គារ ជាមួយប្រធានាធិបតីលីបង់ លោក Joseph Aoun ព្រះមហាក្សត្រAbdullah នៃ ប្រទេសហ្ស៊កដានី បានអះអាងសាជាថ្មីអំពីការគាំទ្ររបស់ប្រទេសរបស់ព្រះអង្គ ចំពោះប្រទេសលីបង់ ក្នុងកិច្ចខិតខំប្រឹងប្រែងរបស់ខ្លួន ដើម្បីការពារសន្តិសុខ ស្ថិរភាព អធិបតេយ្យភាព និងឯកភាពទឹកដី។

មេដឹកនាំទាំងពីរ ក៏បានសង្កត់ធ្ងន់លើ «សារៈសំខាន់នៃការរក្សាសន្តិសុខ និងស្ថិរភាព នៅក្នុងប្រទេសស៊ីរី ដែលនឹងជួយសម្រួលដល់ការវិលត្រឡប់ដោយស្ម័គ្រចិត្ត និងសុវត្ថិភាពរបស់ជនភៀសខ្លួនស៊ីរី» ទៅកាន់ប្រទេសកំណើតរបស់ពួកគេវិញ។

លោក Aoun បានសរសើរហ្ស៊កដានីសម្រាប់តួនាទីដែលខ្លួនបានបំពេញ ក្រោមការដឹកនាំរបស់ព្រះមហាក្សត្រ Abdullah ក្នុងការរួមសាមគ្គីមួយលីបង់ និងប្រជាជនរបស់ខ្លួន និងផ្តល់ការគាំទ្រដល់កងទ័ពលីបង់។

លោកក៏បានលើកឡើងពីសារៈសំខាន់នៃ«ការពង្រឹងកិច្ចសហប្រតិបត្តិការសន្តិសុខ និងការពារជាតិរវាងប្រទេសទាំងពីរ ជាពិសេសក្នុងវិស័យប្រយុទ្ធប្រឆាំងអំពើភេរវកម្ម និងការរត់ពន្ធ»។

នៅក្នុងសេចក្តីថ្លែងការណ៍រួមមួយ ព្រះមហាក្សត្រ Abdullah និង លោក Aoun បានសង្កត់ធ្ងន់ថា៖«តម្រូវការ ដើម្បីស្តារឡើងវិញភ្លាមៗនូវបទឈប់បាញ់ នៅក្នុងតំបន់ហ្កាហ្សា ហើយធានាបាននូវជំនួយមនុស្សធម៌គ្រប់គ្រាន់ ទៅដល់គ្រប់តំបន់ទាំងអស់នៃទឹកដីនេះ។ ពួកគេបានច្រានចោលផែនការណាមួយ ក្នុងការផ្លាស់ទីលំនៅប្រជាជនប៉ាឡេស្ទីន ហើយបានជំរុញឲ្យ រដ្ឋអារ៉ាប់ និងសហគមន៍អន្តរជាតិដ៏ទូលំទូលាយនេះ បង្កើនកិច្ចខិតខំប្រឹងប្រែង ដើម្បីឈានដល់ដំណោះស្រាយដ៏ត្រឹមត្រូវ និងគ្រប់ជ្រុងជ្រោយចំពោះជម្លោះរវាងអ៊ីស្រាអែល និងប៉ាឡេស្ទីន ដោយផ្អែកលើដំណោះស្រាយរដ្ឋពីរ។