រដ្ឋមន្ត្រីការពារជាតិ លោក Pete Hegseth កាលពីថ្ងៃអង្គារ (ទី១០ ខែមិថុនា) បានព្យាយាមធានាជាថ្មីដល់សមាជិកសភា ជុំវិញការសន្យារបស់សហរដ្ឋអាមេរិក ក្នុងការផ្គត់ផ្គង់ដល់ប្រទេសអូស្ត្រាលីនូវកងនាវានៃនាវាមុជទឹកដើរដោយថាមពលនុយក្លេអ៊ែរ ចំពេលមានការព្រួយបារម្ភកាន់តែខ្លាំងឡើងៗ ដែលថា ការសាងសង់មិនដំណើរការលឿនគ្រប់គ្រាន់ ដើម្បីបំពេញតាមការប្តេជ្ញាចិត្តនោះ។

ក្រោមកិច្ចព្រមព្រៀងរបស់សម្ព័ន្ធ AUKUS ដែលត្រូវបានចុះហត្ថលេខា ក្នុងឆ្នាំ២០២១ ដោយទីក្រុងវ៉ាស៊ីនតោន ទីក្រុងឡុងដ្រ៍ និងទីក្រុងកង់បេរ៉ា កំពុងសហការលើការអភិវឌ្ឍរួមគ្នានៃឧបករណ៍ការពារការវាយប្រហារតាមប្រព័ន្ធអ៊ីនធឺណិត បញ្ញាសិប្បនិម្មិត (AI) និងមីស៊ីលលឿនជាងសំឡេង។

កិច្ចព្រមព្រៀងនេះតម្រូវឲ្យមានការប្ដេជ្ញាចិត្តពីសហរដ្ឋអាមេរិក ក្នុងការសាងសង់នាវាមុជទឹកកម្រិតខ្ពស់ សម្រាប់អូស្ត្រាលី ដែលជាការវិនិយោគជាមួយនឹងការចំណាយប្រមាណជា ២៣៥ពាន់លានដុល្លារ ក្នុងរយៈពេល ៣០ឆ្នាំ។ អូស្ត្រាលីគ្រោងនឹងទិញនាវាមុជទឹកប្រភេទ Virginia Class យ៉ាងហោចណាស់ ៣គ្រឿងពីសហរដ្ឋអាមេរិក ក្នុងរង្វង់ ១៥ឆ្នាំខាងមុខ ដែលនៅទីបំផុតនឹងផលិតនាវាមុជទឹកដើរដោយថាមពលនុយក្លេអ៊ែរផ្ទាល់ខ្លួន។

តែយ៉ាងណាក្ដី អ្នករិះគន់ចោទជាសំណួរថា ហេតុអ្វីបានជាសហរដ្ឋអាមេរិកលក់នាវាមុជទឹកដើរដោយថាមពលនុយក្លេអ៊ែរទៅឲ្យអូស្ត្រាលី ដោយមិនស្តុកទុកដោយផ្ទាល់ខ្លួនជាមុនសិន។ ហើយនៅពេលត្រូវបានចោទសួរដោយសមាជិកសភាតំណាងរាស្រ្តអាមេរិក លោក Hegseth បានប្រាប់ថា ក្រុមរបស់លោកកំពុងនិយាយ «ជារៀងរាល់ថ្ងៃ« ទៅកាន់ក្រុមហ៊ុនសាងសង់នាវាអាមេរិក Electric Boat និង Huntington Ingalls ដើម្បីឲ្យធានាថា «តម្រូវការមិនត្រឹមតែត្រូវបានបំពេញប៉ុណ្ណោះទេ ប៉ុន្តែការខ្វះខាតក៏កំពុងត្រូវបានដោះស្រាយផងដែរ»។

ហើយចុងក្រោយ លោក Hegseth បានប្តេជ្ញាចិត្តឲ្យមានការដឹកជញ្ជូននាវា តាមការគ្រោងទុក៕