ប្រភពឧស្សាហកម្ម និងពាណិជ្ជកម្ម កាលពីថ្ងៃអង្គារ (ទី១០ ខែមិថុនា) បានប្រាប់ឲ្យដឹងថា សហរដ្ឋអាមេរិក និងម៉ិកស៊ិក កំពុងចរចារលើកិច្ចព្រមព្រៀង ដើម្បីកាត់បន្ថយ ឬលុបចោលតែម្ដងនូវអត្រាពន្ធដែកថែប ៥០ភាគរយរបស់លោកប្រធានាធិបតី Donald Trump លើការនាំចូល ឲ្យដល់បរិមាណជាក់លាក់មួយ។

ប្រភពឧស្សាហកម្មដែលដឹងពីការពិភាក្សានេះ បានបង្ហើបឲ្យដឹងថា លទ្ធផលដែលទំនងជានឹងរួមបញ្ចូលការរៀបចំកូតា ដែលបរិមាណជាក់លាក់ពីម៉ិកស៊ិក អាចបញ្ចូលការមិនជាប់កាតព្វកិច្ចពន្ធ ឬក្នុងអត្រាកាត់បន្ថយមួយ ហើយការនាំចូលណាមួយលើសពីកម្រិតនោះ នឹងត្រូវគិតកម្រិតពេញ ៥០ភាគរយ។

ប្រភពបានឲ្យដឹងថា គេមិនទាន់ច្បាស់ទេថា តើកិច្ចព្រមព្រៀងនេះ នឹងលុបចោលពន្ធទាំងស្រុង សម្រាប់បរិមាណនាំចូលដែកថែបក្នុងកូតា ពីប្រទេសម៉ិកស៊ិក ឬកាត់បន្ថយមកកម្រិតទាបជាងនេះដែរ ឬយ៉ាងណា។ ហើយកម្រិតទំហំជាក់លាក់នៃកូតា ក៏មិនទាន់ត្រូវបានកំណត់ដែរ។

គួរបញ្ជាក់ថា សារព័ត៌មាន Bloomberg បានរាយការណ៍ដំបូង អំពីកិច្ចចរចា ជុំវិញការកាត់បន្ថយពន្ធ សម្រាប់ដែកថែបម៉ិកស៊ិក ដោយដកស្រង់សម្ដីពីបុគ្គលដឹងពីបញ្ហានេះ ដែលនិយាយថា ភាគីទាំង២ ជិតឈានដល់កិច្ចព្រមព្រៀងមួយហើយ។

តែយ៉ាងណាក្ដី សេចក្ដីការណ៍បានបញ្ជាក់ថា លក្ខខណ្ឌនៃកិច្ចព្រមព្រៀងមិនទាន់ត្រូវបានបញ្ចប់សព្វគ្រប់ នៅឡើយទេ តែនឹងអនុញ្ញាតឲ្យក្រុមហ៊ុនអាមេរិកនាំចូលដែកថែបម៉ិកស៊ិក ដោយមិនជាប់ពន្ធ ដរាបណាការនាំចេញសរុប មិនលើសកម្រិតជាក់លាក់មួយ ដោយផ្អែកលើទំហំពាណិជ្ជកម្មកន្លងមក៕