អតីតប្រធានាធិបតីប្រេស៊ីល លោក Jair Bolsonaro បានបដិសេធថា លោកមិនបានដឹកនាំការប៉ុនប៉ងផ្តួលរំលំរដ្ឋាភិបាលនោះឡើយ បន្ទាប់ពីរងបរាជ័យនៅក្នុងការបោះឆ្នោតឆ្នាំ២០២២ ដោយសម្ដីនេះកើតមានក្នុងអំឡុងពេលសវនាការនៃសំណុំរឿងរបស់លោក នៅចំពោះមុខតុលាការកំពូល កាលពីថ្ងៃអង្គារ (ទី១០ ខែមិថុនា) ប៉ុន្តែលោកបានទទួលស្គាល់ថា បានចូលរួមនៅក្នុងកិច្ចប្រជុំដែលមានគោលបំណងកែប្រែលទ្ធផល។

លោក Bolsonaro បាននិយាយថា លោកនិងជំនួយការជាន់ខ្ពស់ បានពិភាក្សាអំពីជម្រើស ក្នុងការទទួលយកលទ្ធផលនៃការបោះឆ្នោត ក្នុងនោះរួមទាំងលទ្ធភាពនៃការដាក់ពង្រាយកងកម្លាំងយោធា និងផ្អាកសិទ្ធិសេរីភាពស៊ីវិលមួយចំនួន ប៉ុន្តែលោកបានបញ្ជាក់ថា សំណើទាំងនោះត្រូវបានទម្លាក់ចោលភ្លាមៗ។

អតីតប្រធានាធិបតី បានប្រាប់ថា៖ «អារម្មណ៍ពេលនោះ គឺថា គ្មានអ្វីផ្សេង ដែលយើងអាចធ្វើបាននោះឡើយ។ យើងត្រូវទទួលយកលទ្ធផលនៃការបោះឆ្នោត»។ ដោយមានកាន់ឯកសារច្បាប់ចម្លងរដ្ឋធម្មនុញ្ញឆ្នាំ១៩៨៨ របស់ប្រទេស ដែលបានបង្កើតឲ្យមានលទ្ធិប្រជាធិបតេយ្យឡើងវិញ បន្ទាប់ពីមានការគ្រប់គ្រងយោធាអស់រយៈពេល ២ទសវត្សរ៍ លោក Bolsonaro បានបន្ថែមថា៖ «ខ្ញុំមិនដែលប្រព្រឹត្តអ្វីផ្ទុយនឹងរដ្ឋធម្មនុញ្ញនោះទេ»។

គួរបញ្ជាក់ថា កាលពីខែមីនា តុលាការកំពូលបានយល់ព្រមបើកសវនាការ លើសំណុំរឿងប្រឆាំងនឹងលោក Bolsonaro និងបុគ្គល ៧រូបផ្សេងទៀត ក្នុងនោះរួមមានទាំងមន្ត្រីយោធាជាច្រើននាក់ផងដែរ ដែលត្រូវបានចោទប្រកាន់ពីបទធ្វើរដ្ឋប្រហារ ដើម្បីរាំរាំងលោក Luiz Inacio Lula da Silva មិនឲ្យឡើងកាន់តំណែង ក្នុងខែមករា ឆ្នាំ២០២៣៕