ចម្ការផ្កាឈូករ័ត្ន ស្រូវសាលី និងចម្ការគ្រាប់ជី នៅទីក្រុង Santa Cruz ប្រទេសលីប៊ីវី នៅមិនទាន់បានប្រមូលផលនោះទេ ស្របពេលដែលកង្វះប្រេងឥន្ធនៈ បានឈានដល់សប្តាហ៍ទី ៥ បង្កឡើងដោយសារការបិទផ្លូវពាក់ព័ន្ធនឹងភាពរំជើបរំជួលនយោបាយ ។

លោក Daniel Vasquez គឺជាកសិករមួយរូបដែលរង់ចាំប្រេងឥន្ធនៈអស់រយៈពេលជាច្រើនម៉ោង បានបង្ហាញភាពខកចិត្តរបស់លោកចំពោះការផ្អាកគ្រឿងចក្រ និងការពន្យាពេលការប្រមូលផល ដោយរូបលោកព្រួយបារម្ភចំពោះការខាតបង់ដូចកាលពីឆ្នាំមុន ។

លោក Diego Flores គឺជាប្រតិបត្តិករគ្រឿងចក្រកសិកម្មដែលរាយការណ៍ថា ការដំាផ្កាឈូករ័ត្នត្រូវបានពន្យាពេលនោះ និយាយថា ពួកយើងបានរង់ចាំប្រេងឥន្ធនៈ ៦០០លីត្រអស់រយៈពេលជាច្រើនសប្តាហ៍មកហើយ ហើយគ្រឿងចក្ររបស់ពួកយើង ប្រើប្រាស់ប្រេងឥន្ធនៈ ៣០០លីត្រក្នុង ១ថ្ងៃ ។

កង្វះខាតប្រេងឥន្ធនៈ បានធ្វើឲ្យប៉ះពាល់ផងដែរដល់ប្រព័ន្ធធារាសាស្រ្ត និងការបូមទឹកសម្រាប់ការប្រើប្រាស់របស់មនុស្ស និងសត្វ ។

លោក Vasquez និយាយថា ពួកយើងបូបទឹកផឹករបស់ពួកយើង ដោយប្រើប្រាស់ម៉ាស៊ីន ។ សត្វគោរបស់ពួកយើងផឹកទឹកបូមដោយប្រើម៉ាស៊ីន ហើយពួកយើងមិនអាចទិញសូម្បីតែសាំង ២០លីត្រនៅស្ថានីយប្រេង ។

លោក Yamil Flores គឺជារដ្ឋមន្រ្តីក្រសួងអភិវឌ្ឍន៍ជនបទនិយាយក្នុងសន្និសីទសារព័ត៌មាននៅទីក្រុង La Paz ថា ការខាតបង់កសិកម្មប្រចាំថ្ងៃស្មើនឹងទឹកប្រាក់ជាង ៦លានដុល្លារ ដោយសារការបិទផ្លូវ និងកង្វះប្រេងឥន្ធនៈ ៕