​បាល់ទាត់៖ ​ក្រុម​កំពូល​តារាង Manchester City បាន​ឈានដល់​កិច្ចព្រមព្រៀង​ជាមួយ​ក្លិប​អេ​ស្ប៉ា​ញ Barcelona ហើយ​ក្នុង​ផ្ទេរ​ខ្សែប្រយុទ្ធ​អេ​ស្ប៉ា​ញ Ferran Torres ទៅកាន់​ទឹកដី Camp Nou​។ ​តម្លៃ​នៃ​ការផ្ទេរ​នេះ​ត្រូវបាន​គេ​ដឹងថា Barcelona ត្រូវ​ចំណាយ ៥៥លាន​អឺរ៉ូ និង​ប្រាក់​បូក​បន្ថែម​ផ្សេងទៀត ១០លាន​អឺរ៉ូ​ក្នុង​ការនាំយក​ខ្សែប្រយុទ្ធ​វ័យ ២១ឆ្នាំ​រូបនេះ​។

​​ក្លិប​អេ​ស្ប៉ា​ញ​ដែល​កំពុងមាន​វិបត្តិ​ហិរញ្ញវត្ថុ​មួយ​នេះ នៅតែមាន​លទ្ធភាព​ក្នុងការ​ចំណាយ បន្ទាប់ពី​ទទួលបាន​កម្ចី​បន្ថែម​ពី​ធនាគារ​។ យ៉ាងណាក្តី Barcelona នឹងមិន​អាចដាក់​បញ្ចូល​ឈ្មោះ Ferran Torres ក្នុង​បញ្ជី​កីឡាករ​របស់​ក្លិប​បានឡើយ ដរាបណា​ក្លិប​លក់​ចេញ​កីឡាករ​មួយ​វិញ​ដើម្បី​បំពេញ​តាម​លក្ខខណ្ឌ​របស់ La Liga​។​ ​ខ្សែប្រយុទ្ធ​សញ្ជាតិ​អេ​ស្ប៉ា​ញ​រូបនេះបានបង្ហាញ​ខ្លួន​សរុប ៤៣​ប្រកួត និង​ស៊ុត​បញ្ចូល​ទី ១៦គ្រាប់​ឱ្យ Manchester City តាំងពី​ផ្លាស់​ពី Valencia នៅ​ខែសីហា​ ឆ្នាំ២០២០​។

​Ferran Torres បាន​ចូល​លេង ៦ប្រកួត​ដំបូង​នៅ Premier League ឱ្យ Manchester City មុនពេល​ដែលមាន​របួស​ជើងពេល​ជួយ​ក្រុម​ជំរើសជាតិ​អេ​ស្ប៉ា​ញ​។ ​​Torres ក៏បាន​ប្រាប់​ទៅ Pep Guardiola ថា ​គេ​ចង់​ចាកចេញ​ផងដែរដើម្បី​ធានាបាន​ការលេង​ដែល​ទៀងទាត់​មួយ ស្របពេល​ឱកាស​មិនសូវ​មាននៅ Etihad ក្នុង​តំណែង​ដ៏​ចង្អៀត​ប្រជែង​ជាមួយ Bernado Silva, Jack Grealish, Riyad Mahrez, Gabriel Jesus, Phil Foden និង Raheem Sterling ជាដើម​៕

​អត្ថបទ​៖​នាង សុភា​វុ​ធ