លោក Bahr el-Din Yakoub បានរត់ភៀសខ្លួនចេញពីប្រទេស៊ូដង់ ដើម្បីស្វែងរកទីជម្រកនៅប្រទេសអេហ្ស៊ីប ក្រោយមីស៊ីលបំផ្លិចបំផ្លាញផ្ទះរបស់លោកនៅទីក្រុង Khartoum និងបានសម្លាប់មិត្តភ័ក្តិ៤នាក់ របស់លោក ។

 ប៉ុន្តែដោយសារការលំបាកផ្នែកសេដ្ឋកិច្ច និងការបង្ក្រាបលើជនភៀសខ្លួននៅអេហ្ស៊ីប បានជំរុញឲ្យរូបលោកធ្វើដំណើរតាមផ្លូវវាលខ្សាច់ដ៏គ្រោះថ្នាក់ ឆ្ពោះទៅកាន់តំបន់ភាគឦសានប្រទេសលីប៊ី ហើយបន្ទាប់មកបន្តដំណើតាមសមុទ្រទៅកាន់កោះ Crete របស់ក្រិក ។

 លោក Yakoub វ័យ ២៥ឆ្នាំ ស្ថិតនៅក្នុងចំណោមជនភៀសខ្លួនស៊ូដង់ដែលចាកចេញពីប្រទេសអេហ្ស៊ីប រួចបន្តដំណើរទៅកាន់ប្រទេសលីប៊ី ជាជាងវិលត្រឡប់ទៅកាន់ប្រទេសកំណើតវិញ ជាទីដែលសង្រ្គាមស៊ីវីលបានឆាបឆេះចាប់តាំងពីខែមេសា ឆ្នាំ ២០២៣រហូតមក ។

 យោងតាមតួលេខពីទីភ្នាក់ងារជនភៀសខ្លួនអង្គការសហប្រជាជាតិ(UNHCR) បានឲ្យដឹងថា នៅក្នុងរយៈពេល ៥ខែដំបូងក្នុងឆ្នាំ ២០២៥ ចំនួនជនជាតិស៊ូដង់ធ្វើដំណើរទៅដល់អឺរ៉ុប បានកើនឡើង ១៣៤ភាគរយ ធៀបនឹងរយៈពេលតែមួយ កាលពីរយៈពេល ១ឆ្នាំមុន បើទោះបីជាចំនួនពលរដ្ឋឆ្លងកាត់មកពីអាហ្វ្រិកខាងជើង ធ្លាក់ចុះក៏ដោយ ។

 លោក Yakoub និយាយថា ពួកយើងដឹងតាំងពីដំបូងមកម្ល៉េះពីគ្រោះថ្នាក់នៃការធ្វើដំណើរចេញពីលីប៊ីទៅកាន់អឺរ៉ុប កាត់តាមសមុទ្រ ប៉ុន្តែបើសិនជាពួកយើងបន្តស្នាក់នៅក្នុងប្រទេសស៊ូដង់ ពួកយើងនឹងត្រូវស្លាប់ ។ រឿងតែមួយបានកើតឡើងនៅប្រទេសអេហ្ស៊ីប និងលីប៊ី ពួកយើងនឹងត្រូវស្លាប់ដូចគ្នា ។ ដូច្នេះហើយ ពួកយើងត្រូវតែផ្សងគ្រោះថ្នាក់ធ្វើដំណើរមកកាន់អឺរ៉ុប ។

UNHCR និយាយថា ចាប់តាំងពីសង្រ្គាមផ្ទុះឡើងរវាងកងទ័ពស៊ូដង់ និងកងកម្លាំងគាំទ្ររហ័ស(RSF) ពលរដ្ឋស៊ូដងជាង ៤លាននាក់ បានជម្លៀសខ្លួនទៅកាន់ប្រទេសជិតខាង ៕