ក្រុមមន្រ្តីក្នុងតំបន់និយាយនៅថ្ងៃពុធនេះថា ការវាយប្រហារយានដ្រូនរយៈពេល ៩នាទីរបស់រុស្ស៊ីលើទីក្រុងធំបំផុតទី ២ Kharkiv របស់អ៊ុយក្រែនកាលពីពាក់កណ្តាលយប់កន្លងទៅ បានសម្លាប់មនុស្សយ៉ាងហោច ២នាក់ និងមនុស្ស ៥៧នាក់ផ្សេងទៀត រងរបួស ក្នុងនោះរួមទាំងកុមារ ៧នាក់ផងដែរ ។

លោក Ihor Terekhov គឺជាអភិបាលក្រុង Kharkiv និយាយថា ការវាយប្រហារដោយប្រើប្រាស់យានដ្រូន ១៧គ្រឿង បង្កឲ្យកើតមានអគ្គិភ័យនៅអគារផ្ទះល្វែងកម្ពស់ ៥ជាន់ និងបណ្តាលឲ្យមានការខូចខាតផ្សេងទៀតនៅក្នុងទីក្រុងជាប់ព្រំដែនរុស្ស៊ីមួយនេះ ។

ចំណែកឯលោក Oleh Sinehubov គឺជាអភិបាលតំបន់ Kharkiv និយាយនៅលើបណ្តាញព័ត៌មានសង្គម Telegram ថា មនុស្ស ៩នាក់ដែលរងរបួស រួមទាំងក្មេងស្រីអាយុ ២ឆ្នាំម្នាក់ និងក្មេងប្រុសអាយុ ១៥ឆ្នាំម្នាក់ ត្រូវបានបញ្ជូនទៅកាន់មន្ទីរពេទ្យ ។

លោកបន្តថា ការវាយប្រហារនេះ បានត្រូវចំដឺប៉ូស្តុករថយន្តក្រុង និងអគាររស់នៅជាច្រើនខ្នងទៀត ។

យោធាអ៊ុយក្រែន និយាយថា រុស្ស៊ីបានបើកការវាយប្រហារយានដ្រូន ៨៥គ្រឿងកាលពីយប់កន្លងទៅ ក្នុងនោះយានដ្រូន ៤០គ្រឿង ត្រូវបានបាញ់ទម្លាក់ ។

នៅមិនទាន់មានសេចក្តីអត្ថាធិប្បាយភ្លាមៗនោះទេពីរុស្ស៊ី ។ ទីក្រុង Kharkiv ស្ថិតនៅតំបន់ភាគឦសានអ៊ុយក្រែន បានទប់ទល់នឹងការវាយប្រហារពេញបន្ទុករបស់រុស្ស៊ីនៅថ្ងៃដំបូងនៃសង្រ្គាម ហើយចាប់តាំងពីពេលនោះមក ទីក្រុងមួយនេះ បានក្លាយជាគោលដៅវាយប្រហារញឹកញាប់ដោយយានដ្រូន មីស៊ីល និងគ្រាប់បែកតម្រង់គោលដៅ ៕