រដ្ឋបាល ក្នុងតំបន់ នៅថ្ងៃពុធ (ទី១១ ខែមិថុនា) នេះ បានប្រាប់ឲ្យដឹងថា ចំនួនអ្នកស្លាប់ដោយសារទឹកជំនន់ នៅតំបន់ភាគខាងកើតនៃប្រទេសអាហ្រ្វិកខាងត្បូង បានកើនឡើងដល់យ៉ាងហោចណាស់ ៩នាក់ ខណៈដែលក្រុមអ្នកជួយសង្គ្រោះ កំពុងស្វែងរកក្មេងៗបាត់ខ្លួន បន្ទាប់ពីរថយន្តក្រុង ១គ្រឿង បានហូរទៅតាមខ្សែទឹក។

ការមានព្រិលធា្លក់ និងព្យុះខ្លាំង បានប៉ះពាល់ដល់តំបន់ជាច្រើននៃខេត្ត Eastern Cape ដោយប្រទេសទាំងមូលប្រឈមនឹងលក្ខខណ្ឌអាកាសធាតុត្រជាក់ខ្លាំង នារដូវរងា ចាប់តាំងពីសប្តាហ៍មុន។ ហើយបើតាមសេចក្តីថ្លែងការណ៍របស់រដ្ឋបាល ក្នុងតំបន់ បានឲ្យដឹងថា ភ្លៀងធ្លាក់ខ្លាំង នៅតំបន់ OR Tambo ឥឡូវនេះ បានឆក់យកជីវិតមនុស្ស ៩នាក់ ហើយ ដោយដំឡើងចំនួនអ្នកស្លាប់ពី ៧នាក់ នៅមុននេះ។

សេចក្តីថ្លែងការណ៍នោះបានបន្ថែមថា ការស្វែងរកក្មេងៗបាត់ខ្លួន នៅលើរថយន្តដឹកសិស្ស ដែលបានហូរទៅតាមខ្សែទឹក កំពុងបន្តមាននៅព្រឹកថ្ងៃពុធនេះ។ លោកស្រី Khuselwa Rantjie អ្នកនាំពាក្យរបស់រដ្ឋបាលខេត្ត Eastern Cape បានប្រាប់សារព័ត៌មាន AFP ថា លោកស្រីមិនអាចបញ្ជាក់ពីចំនួនកុមារ ឬមនុស្សពេញវ័យ នៅលើឡានក្រុងនោះបានទេ។ តែប្រព័ន្ធផ្សព្វផ្សាយក្នុងស្រុក បានរាយការណ៍ថា យ៉ាងហោចណាស់មានកុមារ ១០នាក់កំពុងបាត់ខ្លួន។

យោងតាមរដ្ឋាភិបាល បានឲ្យដឹងថា មនុស្សរាប់រយនាក់ត្រូវបានផ្លាស់ទីលំនៅ ចាប់តាំងពីថ្ងៃចន្ទមក ដែលភាគច្រើនមកពីតំបន់ OR Tambo និង Amathole ដោយមួយចំនួនត្រូវបានផ្លាស់ទីលំនៅទៅនៅតាមសាលារៀន និងសាលាក្រុង៕