ប្រព័ន្ធផ្សព្វផ្សាយរដ្ឋ IRNA នៅថ្ងៃពុធ (ទី១១ ខែមិថុនា) នេះ បានរាយការណ៍ថា យ៉ាងហោចណាស់មនុស្ស ៣នាក់ បានគ្រោះថ្នាក់ដល់ជីវិត ហើយ ១០នាក់ទៀត បានរងរបួស នៅពេលដែលសឺទែនស្តុកសារធាតុមេតាន ត្រូវបានអគ្គិភ័យឆាបឆេះ នៅកំពង់ផែ ក្នុងខេត្ត Bushehr ភាគខាងត្បូងនៃប្រទេសអ៊ីរ៉ង់។

ទូរទស្សន៍រដ្ឋ បានរាយការណ៍ថា នាវាដឹកសារធាតុមេតាន ដែលចូលចតនៅកំពង់ផែ Bandar Dayyer និងជាកម្មសិទ្ធិរបស់ក្រុមហ៊ុន Kaveh Petrochemicals បានកើតមានអគ្គិភ័យ ដែលមូលហេតុពិតប្រាកដមិនទាន់ដឹងនៅឡើយទេ។

ចំណែកប្រធានសេវាសង្គ្រោះបន្ទាន់ខេត្ត បានប្រាប់ថា៖ «ដោយគិតពីទំហំនៃអគ្គិភ័យនេះ វាទំនងជាចំនួនអ្នកស្លាប់ និងអ្នករបួស នឹងកើនឡើង»។

គួររំលឹកថា កាលពីខែមេសា ការផ្ទុះដ៏ធំមួយ បានកើតឡើងនៅកំពង់ផែ Shahid Rajaee នៅភាគខាងត្បូងអ៊ីរ៉ង់ ជាហេតុការណ៍ដែលបានបណ្ដាលឲ្យមនុស្សចំនួនយ៉ាងតិច ៥៧នាក់ស្លាប់ ដោយមន្ត្រីមួយចំនួនបានលើកឡើងថា មកពីការស្តុកទុកសារធាតុគីមីមិនបានល្អនៅក្នុងកុងតឺន័រ។ ការស៊ើបអង្កេតជាផ្លូវការលើឧបទ្ទវហេតុនេះមិនទាន់ត្រូវបានបញ្ចប់សព្វគ្រប់នៅឡើយទេ៕