នៅក្នុងសេចក្តីថ្លែងការណ៍មួយផ្ញើទៅកាន់សារព័ត៌មាន Reuters នៅថ្ងៃពុធ (ទី១១ ខែមិថុនា) នេះ រដ្ឋាភិបាល បានឲ្យដឹងថា ប្រទេសកូសូវ៉ូបានព្រមព្រៀងតាមសំណើស្នើឲ្យទទួលជនអន្តោប្រវេន៍ដែលត្រូវបាននិរទេសចេញពីសហរដ្ឋអាមេរិក ដោយផែនការដំបូងនឹងទទួលយកនិរទេសជនចំនួន ៥០នាក់ ក្នុង ១ឆ្នាំ។

សេចក្ដីថ្លែងការណ៍ បានបញ្ជាក់ថា៖ «រដ្ឋាភិបាលបានបង្ហាញពីការត្រៀមខ្លួន ក្នុងការចូលរួម ដោយអាចជ្រើសរើសបុគ្គលពីក្រុមដែលត្រូវបានស្នើឡើងនោះ ផ្តល់ឲ្យពួកគេបំពេញតាមលក្ខណៈវិនិច្ឆ័យជាក់លាក់ ទាក់ទងនឹងនីតិរដ្ឋ និងសណ្តាប់ធ្នាប់សាធារណៈ»។

គួរបញ្ជាក់ថា សហរដ្ឋអាមេរិកកំពុងស្វែងរកដៃគូ ដើម្បីឲ្យព្រមទទួលយកជនអន្តោប្រវេសន៍ ខណៈដែលប្រទេសនេះកំពុងបំពេញតាមការសន្យារបស់លោកប្រធានាធិបតី Donald Trump ដែលចង់ឲ្យមានការនិរទេសកម្រិតកំណត់ត្រា។

កូសូវ៉ូ ដែលជាប្រទេសនៅតំបន់បាល់កង់មានប្រជាជន ១,៦លាននាក់ មានកិច្ចព្រមព្រៀងរួចជាស្រេច ក្នុងការទទួលអ្នកទោស ៣០០នាក់ពីប្រទេសដាណឺម៉ាក ដែលចាប់ផ្តើមនៅឆ្នាំ២០២៧ ជាថ្នូរនឹងប្រាក់ចំនួន ២១០លានអឺរ៉ូ ក្នុងរយៈពេល ១ទសវត្សរ៍បន្ទាប់ ហើយបានបង្ហាញពីចំណាប់អារម្មណ៍ក្នុងការទទួលយកនិរទេសជនពីប្រទេសអង់គ្លេស។

ទំនាក់ទំនងកូសូវ៉ូ-សហរដ្ឋអាមេរិក មានភាពរឹងមាំជាពិសេស ដោយសារការនាំមុខរបស់សហរដ្ឋអាមេរិក ក្នុងការគាំទ្រដល់ការទទួលបានឯករាជ្យពីប្រទេសស៊ែប៊ី កាលពីឆ្នាំ២០០៨៕