ទីភ្នាក់ងារស្ទាបស្ទង់ភូគព្ភសាស្ត្រអាមេរិក (USGS) បានឲ្យដឹងថា រញ្ជួយដីកម្រិត ៥,៩រ៉ិចទ័រ បានកើតមាននៅកោះតៃវ៉ាន់ នាថ្ងៃពុធ (ទី១១ ខែមិថុនា) នេះ ដោយអ្នកសារព័ត៌មានរបស់ទីភ្នាក់ងារសារព័ត៌មាន AFP បានរាយការណ៍ថា អគារនានា បានញ័រនៅក្នុងរដ្ឋធានីតៃប៉ិ។

USGS បានឲ្យដឹងថា រញ្ជួយដីនេះបានកើតឡើងនៅជម្រៅប្រហែល ៣១គីឡូម៉ែត្រ ពីឆ្នេរភាគខាងកើត ដែលមានចម្ងាយ ៧១គីឡូម៉ែត្រ នៅភាគខាងត្បូងនៃទីក្រុង Hualien។ ហើយនាយកដ្ឋានពន្លត់អគ្គិភ័យ Taitung បានប្រាប់សារព័ត៌មាន AFP ថា ភ្លាមៗនេះ មិនទាន់មានរបាយការណ៍អំពីការខូចខាត ឬជនរងគ្រោះនៅឡើយទេ។

អ្នកពន្លត់អគ្គភ័យនៅទីក្រុងឆ្នេរ Chenggong បាននិយាយថា៖ «នៅពេលដែលរញ្ជួយដី បានកើតឡើង អេក្រង់កុំព្យូទ័រ និងកង្ហារញ័រយ៉ាងខ្លាំង»។ លោកបានប្រាប់សារព័ត៌មាន AFP បន្ថែមថា៖ «វាមានកម្រិតខ្លាំងជាងការរញ្ជួយមុនៗ។ ភ្លាមៗ ខ្ញុំបានគិតរត់ចេញខាងក្រៅអគារ»។

គួររំលឹកថា គ្រោះរញ្ជួយដីដ៏ធំចុងក្រោយ បានកើតឡើងនៅក្នុងខែមេសា ឆ្នាំ២០២៤ នៅពេលដែលកោះនេះត្រូវបានវាយប្រហារដោយរញ្ជួយដីកម្រិត ៧,៤រិចទ័រ ដែលក្រុមមន្ត្រីបាននិយាយថា ជាការរញ្ជួយខ្លាំងបំផុតជាលើកដំបូង ក្នុងរយៈពេល ២៥ឆ្នាំ។ យ៉ាងហោចណាស់មនុស្ស ១៧នាក់ បានបាត់បង់ជីវិត នៅក្នុងហេតុកាណ៍រញ្ជួយដីនោះ ដែលបានបង្កឲ្យមានបំណាក់ដី និងធ្វើឲ្យអគារខូចខាតយ៉ាងធ្ងន់ធ្ងរ នៅជុំវិញទីក្រុង Hualien៕