សេតវិមានបាននិយាយកាលពីថ្ងៃពុធ (១១ មិថុនា) ថា លោកប្រធានាធិបតីអាមេរិក Donald Trump នឹងស្វាគមន៍ការប្រាស្រ័យទាក់ទងជាមួយមេដឹកនាំកូរ៉េខាងជើង លោក Kim Jong Un បន្ទាប់ពីមានទំនាក់ទំនងមិត្តភាពជាមួយលោក Kim ក្នុងអំឡុងពេលអាណត្តិដំបូងរបស់លោក។

អ្នកនាំពាក្យសេតវិមាន លោកស្រី Karoline Leavitt ប្រាប់អ្នកយកព័ត៌មានថា "លោកប្រធានាធិបតី Trump នៅតែបើកចំហទទួលយកការឆ្លើយឆ្លងជាមួយលោក Kim Jong Un"។ លោកស្រីលើកឡើងបែបនេះដើម្បីឆ្លើយតបនឹងរបាយការណ៍មួយពីគេហទំព័រតាមដានកូរ៉េខាងជើង NK News មានមូលដ្ឋាននៅទីក្រុងសេអ៊ូល ដែលរាយការណ៍ថា គណៈប្រតិភូកូរ៉េខាងជើង នៅអង្គការសហប្រជាជាតិ ក្រុងញូវយ៉ក បានបដិសេធម្តងហើយម្តងទៀតមិនទទួលយកលិខិតពីលោក Trump ទៅកាន់លោក Kim។

គួររម្លឹកថា លោក Trump និងលោក Kim បានរៀបចំកិច្ចប្រជុំកំពូលចំនួន ៣ដង អំឡុងអាណត្តិដំបូងឆ្នាំ ២០១៧-២០២១ របស់លោក Trump ហើយបានផ្លាស់ប្តូរនូវអ្វីដែលលោក Trump ហៅថា លិខិត "ដ៏ស្រស់ស្អាត" មួយចំនួន។ នៅក្នុងខែមិថុនា ឆ្នាំ២០១៩ លោក Trump បានឈានជើងចូលទឹកដីកូរ៉េខាងជើងមួយរយៈខ្លី ពីតំបន់គ្មានយោធាជាមួយកូរ៉េខាងត្បូង។

យ៉ាងណាក៏ដោយ មានវឌ្ឍនភាពតិចតួចណាស់ត្រូវបានធ្វើឡើង ក្នុងការទប់ស្កាត់កម្មវិធីនុយក្លេអ៊ែររបស់កូរ៉េខាងជើង ហើយលោក Trump បានទទួលស្គាល់កាលពីខែមីនាថា ទីក្រុងព្យុងយ៉ាងគឺជា "មហាអំណាចនុយក្លេអ៊ែរ"។ ចាប់តាំងពីជំនួបកំពូលអាណត្តិទីមួយរបស់លោក Trump ជាមួយលោក Kim បានបញ្ចប់មក កូរ៉េខាងជើងមិនបានបង្ហាញចំណាប់អារម្មណ៍ក្នុងការវិលត្រឡប់មកកិច្ចចរចាវិញទេ៕