មន្ត្រីនៅទីបញ្ជាការបាននិយាយកាលពីថ្ងៃពុធថា ទាហានសហរដ្ឋអាមេរិកដែលត្រូវបានដាក់ពង្រាយនៅទីក្រុង Los Angeles ត្រូវបានអនុញ្ញាតឱ្យឃុំខ្លួនមនុស្ស រហូតដល់នគរបាលអាចចាប់ខ្លួនពួកគេ ខណៈ ទាហានម៉ារីនរាប់រយនាក់ ត្រូវដាក់ពង្រាយចូលទៅក្នុងទីក្រុង ក្នុងពេលការតវ៉ាឈានចូលដល់ថ្ងៃទី៦។

ការតវ៉ាជុំវិញ ការឆ្មក់បង្ក្រាបជនអន្តោប្រវេសន៍ខុសច្បាប់របស់លោក Trump បានរាលដាលពីរដ្ឋកាលីហ្វ័រនីញ៉ា រហូតទីក្រុងជាច្រើនទៀតនៅសហរដ្ឋអាមេរិក ហើយបាតកម្មកាន់តែច្រើននៅទូទាំងប្រទេស ត្រូវបានគ្រោងទុកនៅថ្ងៃសៅរ៍។



ការសម្រេចចិត្តរបស់លោក Trump ក្នុងការបញ្ជូនកងទ័ពទៅកាន់ទីក្រុង Los Angeles ជុំវិញការជំទាស់របស់អភិបាលរដ្ឋកាលីហ្វ័រនីញ៉ា លោក Gavin Newsom បានបង្កឱ្យមានការពិភាក្សាដេញដោលថ្នាក់ជាតិ អំពីការប្រើប្រាស់យោធានៅលើទឹកដីសហរដ្ឋអាមេរិក។ រដ្ឋបាលរបស់ លោក Newsom បានប្តឹងរដ្ឋាភិបាលសហរដ្ឋអាមេរិក ជុំវិញការដាក់ពង្រាយនេះ។

ឧត្តមសេនីយ Scott Sherman ដែលកំពុងបញ្ជាកងទ័ពអាមេរិក បានប្រាប់អ្នកសារព័ត៌មានថា កងម៉ារីនចំនួន៧០០នាក់ និងកងទ័ពឆ្មាំជាតិចំនួន៤.០០០នាក់ ដែលលោក Trump បានបញ្ជាឲ្យទៅកាន់ទីក្រុង Los Angeles ពុំមានសិទ្ធិអំណាចចាប់ខ្លួន នោះទេ ។ ប៉ុន្តែ លោក Sherman បាននិយាយថា ពួកគេមានសិទ្ធិអំណាចក្នុងការឃុំខ្លួនបុគ្គលជាបណ្ដោះអាសន្ន រហូតដល់ការអនុវត្តច្បាប់អាចចាប់ខ្លួនពួកគេ ប្រសិនបើចាំបាច់ដើម្បីបំពេញបេសកកម្មរបស់ខ្លួនក្នុងការការពារបុគ្គលិក ឬទ្រព្យសហព័ន្ធ។