កងកម្លាំងនគរបាលនៅទីក្រុង Los Angeles បានចាប់ខ្លួនមនុស្សជាង ២០០ នាក់ពេញមួយយប់កាលពីថ្ងៃអង្គារសប្ដាហ៍នេះ បន្ទាប់ពីអភិបាលក្រុងលោកស្រី Karen Bass បានអនុវត្តបម្រាមគោចរ  ខណៈក្រុមកុបករនៅតែបន្តតវ៉ាចំពោះការអនុវត្តច្បាប់បង្ក្រាបអន្តោប្រវេសន៍របស់លោកTrump ហើយមានករណីលួចទំនិញ និងបំផ្លិចបំផ្លាញទូទាំងទីក្រុងនេះ។

លោកស្រី Bass បានប្រកាសគ្រាអាសន្នក្នុងតំបន់នេះ នៅថ្ងៃទីប្រាំនៃការតវ៉ាដ៏រំជើបរំជួប ហើយបាននិយាយថាបម្រាមគោចរបានដំណើរការចាប់តាំងពីម៉ោង៨យប់ថ្ងៃអង្គារមក និងបន្តដល់ម៉ោង ៦ ព្រឹកថ្ងៃពុធម៉ោងនៅសហរដ្ឋអាមេរិក ជាមួយគ្នានោះ បម្រាមនេះ ត្រូវគេរំពឹងថានឹងមានរយៈពេលជាច្រើនថ្ងៃទៅមុខទៀត។

អភិបាលក្រុងរូបនេះ បានសរសេរនៅលើបណ្ដាញសង្គម X ថា លោកស្រី បានចេញបម្រាមគោចរ សម្រាប់ទីក្រុង Los Angeles គឺដើម្បីបញ្ឈប់តួអង្គអាក្រក់ដែលកំពុងទាញយកផលប្រយោជន៍ពីការកើនឡើងភាពវឹកវររបស់ប្រធានាធិបតី ។

បម្រាមគោចរគ្របដណ្តប់លើផ្នែកនៃផ្ទៃដី១ម៉ាយល៍ក្រឡានៃទីក្រុងនេះ ដោយរួមបញ្ចូលទាំងតំបន់ដែលការតវ៉ាបានកើតឡើងចាប់តាំងពីថ្ងៃសុក្រមក។ ទីក្រុង Los Angeles គ្របដណ្តប់ប្រហែល ៥០០ម៉ាយល៍ក្រឡា។ស្នងការនគរបាលក្រុង Los Angeles បាននិយាយក្នុងសេចក្តីប្រកាសព័ត៌មានថា មានការចាប់ខ្លួនចំនួន ២០៣ករណី សម្រាប់ការមិនព្រមបំបែកជួរ និង១៧ ករណី សម្រាប់ការបំពានបម្រាមគោចរ ៣ករណីសម្រាប់ការកាន់កាប់អាវុធ មួយករណីសម្រាប់ការវាយប្រហារដោយអាវុធលើមន្ត្រីនគរបាលម្នាក់ និងមួយករណីទៀតសម្រាប់ការបាញ់ឡាស៊ែរលើយន្តហោះកងទ័ពអាកាសរបស់ស្នងការនគរបាលក្រុង Los Angeles៕