យោងតាមទីភ្នាក់ងារទេសន្តរប្រវេសន៍អន្តរជាតិ IOM របស់អង្គការសហប្រជាជាតិ បានឱ្យដឹងថា មនុស្សចំនួន ១,៣លាននាក់ ដែលជាតួលេខខ្ពស់បំផុតក្នុងកំណត់ត្រា ត្រូវបានបង្ខំឱ្យរត់ភៀសខ្លួនចាកចេញពីផ្ទះសម្បែងរបស់ពួកគេនៅក្នុងប្រទេសហៃទី ដោយសារតែការកើនឡើងនៃអំពើហិង្សាប្រដាប់អាវុធដ៏តានតឹងក្នុងរយៈពេល ៦ខែចុងក្រោយនេះ។

អង្គការ IOM លើកឡើងថា ចំនួនមនុស្សដែលភៀសខ្លួនក្នុងស្រុក នៅក្នុងប្រទេសសមុទ្រការ៉ាអ៊ីបមួយនេះ បានហក់ឡើង ២៤% ចាប់តាំងពីខែធ្នូមក។ តួលេខនេះជាចំនួនជនភៀសខ្លួនដោយអំពើហិង្សាច្រើនបំផុតមិនធ្លាប់មានកត់ត្រាដោយ IOM ក្នុងប្រទេសហៃទី។

អង្គការសហប្រជាជាតិនិយាយថា ក្រុមជនអន្ធពាលប្រដាប់ដោយអាវុធ ដែលភាគច្រើនត្រូវបានជួញដូរពីសហរដ្ឋអាមេរិក បានបង្កើតជាសម្ព័ន្ធមួយក្នុងរដ្ឋធានីព័រអូប្រាំង និងរួមគ្នាគ្រប់គ្រងរហូតដល់ ៨៥% នៃទឹកដីទីក្រុងនេះ។ IOM បានឱ្យដឹងថា ចំនួនមនុស្សកាន់តែច្រើនឡើង កំពុងភៀសខ្លួនចេញពីរដ្ឋធានីដើម្បីសុវត្ថិភាពទៅកន្លែងផ្សេងទៀតនៅក្នុងប្រទេស។

IOM បន្ថែមថា ប្រជាជនជាច្រើនកំពុងរស់នៅក្នុងជម្រកបណ្តោះអាសន្ន ហើយពុំមានលទ្ធភាពទទួលបានការថែទាំសុខភាព សាលារៀន ឬទឹកស្អាតនោះទេ។ កាលពីខែកុម្ភៈ អង្គការកុមារ យូនីសេហ្វ បានរាយការណ៍ពីកំណើនហិង្សាផ្លូវភេទលើកុមារនៅហៃទី ហើយបានឱ្យដឹងថា ភាពក្រីក្រខ្លាំងក៏រុញច្រានកុមារឱ្យក្លាយទៅជាក្រុមជនអន្ធពាលផងដែរ ដោយមានរហូតដល់ពាក់កណ្តាលនៃក្រុមប្រដាប់អាវុធទាំងអស់ ត្រូវបង្កើតឡើងដោយអនីតិជន៕