កំពង់ឆ្នាំង៖ ឯកឧត្ដមរ៉ូហ្វី អូស្មាននិងលោកជំទាវម៉ាណណាវី បានមានប្រសាសន៍ថា ទីណាមានការលំបាកទីនោះមានវត្តមានគណបក្សប្រជាជនកម្ពុជា ដើម្បីជួយឧបត្ថម្ភគាំទ្រទាំងស្មារតីនិងសម្ភារៈជូនដល់ប្រជាពលរដ្ឋក្រីក្ររងគ្រោះដោយសារធម្មជាតិផ្សេងៗគ្រប់កាលៈទេសៈដោយមិនប្រកាន់ពូជសាសន៍និន្នាការគណបក្សនយោបាយឡើយ។
ឯកឧត្ដម រ៉ូហ្វី អូស្មាន តំណាងរាស្ត្រមណ្ឌលពោធិសាត់ លោកជំទាវ ម៉ាណណាវី តំណាងរាស្ត្រមណ្ឌលភ្នំពេញបានថ្លែងខណៈបានដឹកនាំគណៈប្រតិភូបានចុះសាកសួរសុខទុក្ខនិងបាននាំយកអំណោយរបស់អង្គការមូលនិធិអាស៊ាន ដើម្បីអប់រំនិងការអភិវឌ្ឍមានអង្ករមីត្រីខចែកជូនប្រជាពលរដ្ឋក្រីក្រចំនួន១០០គ្រួសារ និងប្រគល់សមិទ្ធផលមានផ្ទះអណ្ដូងទឹកស្អាតខ្នាតតូច និងខ្នាតធំចំនួន ២៥៦អណ្ដូងចំណាយថវិកាជាង៦២៣លានរៀល នៅភូមិត្រពាំងខ្ចុំឃុំឈូកសស្រុកកំពង់ត្រឡាចខេត្តកំពង់ឆ្នាំងព្រឹកថ្ងៃទី២២ធ្នូដោយមានការអញ្ជើញចូលរួមពីឯកឧត្ដម អភិបាលខេត្តកំពង់ឆ្នាំង។
ឯកឧត្ដម រ៉ូហ្វី អូស្មាន បានបន្តថា ប្រមុខដឹកនាំគណបក្សប្រជាជនកម្ពុជាបានខិតខំប្រឹងប្រែងគិតគូរពីជីវភាពរស់នៅនិងការលំបាករបស់ប្រជាពលរដ្ឋតាំងពីស្បៀងអាហារដីស្រែចំការផ្ទះសម្បែងសុខមាលភាពជាពិសេសស្វែងរកវ៉ាក់សាំងចាក់ជូនប្រជាពលរដ្ឋដោយឥតគិតថ្លៃរហូតមកដល់ពេលនេះអត្រាការឆ្លងជំងឺកូវីដ-១៩ ធ្លាក់ចុះដំណើរការបើកប្រទេសឡើងវិញលើគ្រប់វិស័យធ្វើឱ្យមានកំណើនសេដ្ឋកិច្ចជាតិ។ ឯកឧត្ដម រ៉ូហ្វី អូស្មានមានប្រសាសន៍ថាសាសនាទាំងអស់នៅកម្ពុជាមានសុខដុមរណីយកម្មជាមួយគ្នាយ៉ាងសន្តិភាពដោយគ្មានការ រើសអើងចំពោះសាសនាដទៃនោះឡើយ។
លើសពីនេះសម្ដេចតេជោនាយករដ្ឋមន្ត្រីមិនបានរើសអើងឬបែងចែកចំពោះប្រជា ពលរដ្ឋដែលគោរពសាសនាផ្សេងគ្នានោះឡើយ។ ជាក់ស្ដែងចំពោះអ្នកគោរពសាសនាឥស្លាមនៅកម្ពុជាសម្ដេចបានតែងតាំងតួនាទីឋានៈនៅក្នុងស្ថាប័ននីតិប្បញ្ញត្តិមានព្រឹទ្ធសភារដ្ឋសភានិងស្ថាប័ននីតិប្រតិបត្តិក្នុងជួររាជរដ្ឋាភិបាលមានឋានៈស្មើទេសរដ្ឋមន្ត្រី រដ្ឋមន្ត្រី និងតួនាទីជារដ្ឋលេខាធិការអនុរដ្ឋលេខាធិការអភិបាលរងខេត្ត ក្រុងស្រុកខណ្ឌ ក្រុមប្រឹក្សារាជធានីខេត្តស្រុកខ័ណ្ឌសង្កាត់ ដើម្បីឲ្យចូលរួមចំណែកកសាងនិងអភិវឌ្ឍន៍ប្រទេស ជាតិឲ្យបានរីកចំរើន។ទោះបីនៅកម្ពុជាការឆ្លងជំងឺកូវីដ-១៩ធ្លាក់ចុះយ៉ាងណាក៏ដោយឯកឧត្ដមសូមអំពាវនាវដល់បងប្អូនប្រជាពលរដ្ឋត្រូវបន្តយក ចិត្តទុកដាក់ប្រុងប្រយ័ត្នជានិច្ចបន្តអនុវត្តនូវវិធានការ ៣ ការពារ៣ កុំរបស់ប្រមុខដឹកនាំនិងក្រសួងសុខាភិបាល៕ អត្ថបទ៖ ម៉ក់ រ៉េនីតា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
