ប្រធានាធិបតីប្រទេសបូលីវី លោក លូអ៊ីស អាស(Luis Arce) កាលពីថ្ងៃពុធ ទី១១ ខែមិថុនា បានបញ្ជា ឱ្យបោសសម្អាតផ្លូវហាយវ៉េ ដែលជាច្រើនថ្ងៃមកនេះ ត្រូវបានកាន់កាប់ដោយអ្នកដើរតាមអតីតប្រធានាធិបតី លោក Evo Morales ក្នុងពេលលោកកំពុងស្វែងរកការបង្ខំឲ្យគេទទួលយកបេក្ខភាពប្រធានាធិបតីរបស់លោកសម្រាប់ការបោះឆ្នោត នៅខែសីហា។

កាលពីថ្ងៃពុធ ប្រព័ន្ធផ្សព្វផ្សាយជាតិ Unitel បានរាយការណ៍ពីចំណុចបិទផ្លូវចំនួន២១កន្លែងនៅទូទាំងប្រទេស ដែលដឹកនាំដោយអ្នកគាំទ្រ លោក Morales ។

ការតវ៉ានេះ ផ្តើមចេញពីស្ថានភាពសេដ្ឋកិច្ច ការទាមទារឱ្យប្រធានាធិបតីលោក Arce ចុះចេញពីតំណែង និងការទាមទារឱ្យលោក Evo Morales ត្រូវបានផ្តល់លក្ខណៈសម្បត្តិគ្រប់គ្រាន់ជាបេក្ខជនសម្រាប់ការបោះឆ្នោតប្រធានាធិបតីបន្ទាប់ ដែលលោកត្រូវបានគេដកសិទ្ធិដោយរដ្ឋធម្មនុញ្ញ។

នៅទីក្រុង Cochabamba នគរបាលនិងកងទ័ព បានធ្វើប្រតិបត្តិការបោសសម្អាតផ្លូវឆ្ពោះទៅភាគខាងលិច។ នៅតំបន់នោះ ការប៉ះទង្គិចគ្នាជាច្រើន បានកើនឡើងដោយសារការប្រើប្រាស់គ្រឿងផ្ទុះដោយក្រុមបាតុករ ខណៈនគរបាល បានប្រើប្រាស់ឧស្ម័នបង្ហៀរទឹកភ្នែកទៅលើក្រុមបាតុករ។