យោងតាមក្រុមមន្ត្រីនៅសហរដ្ឋអាមេរិក និងអឺរ៉ុប បានឱ្យដឹងថា អ៊ីស្រាអែលហាក់ដូចជាកំពុងរៀបចំធ្វើការវាយប្រហារមួយក្នុងពេលឆាប់ៗនេះលើអ៊ីរ៉ង់ ក្នុងជំហានមួយដែលអាចធ្វើឱ្យមជ្ឈិមបូព៌ាកាន់តែក្តៅគគុក និងបង្អាក់ ឬពន្យារពេលកិច្ចខិតខំរបស់រដ្ឋបាលលោកប្រធានាធិបតីអាមេរិក Donald Trump ដើម្បីសម្របសម្រួលកិច្ចព្រមព្រៀងកាត់ផ្តាច់ផ្លូវរបស់អ៊ីរ៉ង់ ក្នុងការបង្កើតគ្រាប់បែកនុយក្លេអ៊ែរ។

ក្ដីបារម្ភពីលទ្ធភាពនៃការវាយប្រហាររបស់អ៊ីស្រាអែល និងការរំពឹងទុកនៃការសងសឹកដោយអ៊ីរ៉ង់ បានដឹកនាំឱ្យសហរដ្ឋអាមេរិក កាលពីថ្ងៃពុធ ចាត់វិធានការដកអ្នកការទូតចេញពីអ៊ីរ៉ាក់ និងអនុញ្ញាតឱ្យមានការចាកចេញដោយស្ម័គ្រចិត្តនៃសមាជិកគ្រួសារយោធាអាមេរិក ពីមជ្ឈិមបូព៌ា។

គេមិនច្បាស់ទេថាតើការវាយប្រហាររបស់អ៊ីស្រាអែលនោះអាចមានទំហំប៉ុណ្ណា ប៉ុន្តែកំណើនភាពតានតឹងបានកើតមានឡើង បន្ទាប់ពីប៉ុន្មានខែដែលលោកនាយករដ្ឋមន្ត្រីអ៊ីស្រាអែល Benjamin Netanyahu ជំរុញឱ្យលោក Trump ចាប់យកឱកាសនូវអ្វីដែលអ៊ីស្រាអែល មើលឃើញថាជាភាពងាយរងគ្រោះរបស់អ៊ីរ៉ង់ ចំពោះការវាយប្រហារ។

លោក Trump បានច្រានលផែនការមួយផ្សេងទៀតរបស់អ៊ីស្រាអែល កាលពីប៉ុន្មានខែមុនដើម្បីវាយប្រហារអ៊ីរ៉ង់ ដោយទទូចថា លោកចង់មានឱកាសចរចារកិច្ចព្រមព្រៀងជាមួយទីក្រុងតេអេរ៉ង់ ហើយកាលពី ២សប្តាហ៍មុន លោក Trump ក៏បាននិយាយថា លោកបានព្រមានលោក Netanyahu មិនឱ្យវាយប្រហារ ខណៈការចរចារអាមេរិក-អ៊ីរ៉ង់ កំពុងដំណើរការ។

យ៉ាងណាក៏ដោយ ការសម្រេចចិត្តរបស់អាមេរិក ក្នុងការដកបុគ្គលិកចេញពីតំបន់ រួមជាមួយនឹងការព្រមានពីចក្រភពអង់គ្លេស ពីការគំរាមកំហែងថ្មីចំពោះការដឹកជញ្ជូនពាណិជ្ជកម្មនៅមជ្ឈិមបូព៌ា បានកើតឡើងប៉ុន្មានម៉ោងប៉ុណ្ណោះបន្ទាប់ពីលោក Trump បានប្រាប់កាសែត New York Post នៅក្នុងកម្មវិធីមួយដែលចេញផ្សាយកាលពីថ្ងៃពុធថា លោក "មិនសូវជឿជាក់ទេ" លើចក្ខុវិស័យសម្រាប់កិច្ចព្រមព្រៀងនុយក្លេអ៊ែរជាមួយអ៊ីរ៉ង់៕