មន្ត្រីការពារជាតិសហរដ្ឋអាមេរិក និយាយថា មន្ទីរបញ្ចកោណកំពុងពិនិត្យមើលឡើងវិញនូវក្របខ័ណ្ឌសន្តិសុខ អាគូស(AUKUS) របស់សហរដ្ឋអាមេរិក អង់គ្លេស និងប្រទេសអូស្ត្រាលី។ ភាពជាដៃគូត្រីភាគី ត្រូវបានចាប់ផ្តើមនៅឆ្នាំ២០២១ ក្រោមរដ្ឋបាលរបស់លោកប្រធានាធិបតី Joe Biden ។

មន្ត្រីបាននិយាយកាលពីថ្ងៃពុធថា ក្រសួងការពារជាតិកំពុងពិនិត្យមើលឡើងវិញ AUKUS ជា «ផ្នែកមួយនៃការធានាបានថា គំនិតផ្តួចផ្តើមនៃរដ្ឋបាលមុនស្របតាមរបៀបវារៈ «America First» របស់លោកប្រធានាធិបតី Donald Trump ដែរ ឬយ៉ាងណា។

សសរស្តម្ភមួយក្នុងចំណោមសសរស្តម្ភរបស់ AUKUS គឺជាផែនការដាក់ពង្រាយនាវាមុជទឹកវាយប្រហារដើរដោយថាមពលនុយក្លេអ៊ែររបស់សហរដ្ឋអាមេរិក ទៅកាន់ប្រទេសអូស្ត្រាលី ក្នុងទសវត្សរ៍ឆ្នាំ២០៣០។ កាសែត Financial Times បានរាយការណ៍ថា ការពិនិត្យឡើងវិញដើម្បីកំណត់ថាតើសហរដ្ឋអាមេរិកគួរតែលុបចោលគម្រោងនេះ ដែលកំពុងដឹកនាំដោយអនុរដ្ឋមន្ត្រីការពារជាតិ លោក Elbridge Colby ទទួលបន្ទុកគោលនយោបាយ ឬយ៉ាងណា។

ប្រព័ន្ធផ្សព្វផ្សាយបាននិយាយផងដែរនូវការព្រួយបារម្ភនៅក្នុងសហរដ្ឋអាមេរិក ដែលថាក្របខ័ណ្ឌនេះអាចធ្វើឲ្យអន្តរាយដល់សន្តិសុខរបស់ប្រទេស ខណៈកងទ័ពជើងទឹក កំពុងព្យាយាមផលិតនាវាមុជទឹកអាមេរិកបន្ថែមទៀត។

អ្នករិះគន់មួយចំនួននិយាយថា អាមេរិកគួរតែផ្តោតលើការពង្រឹងសមត្ថភាពផ្ទាល់ខ្លួនរបស់កងកម្លាំងអាមេរិក ជាជាងការដាក់ពង្រាយនាវាមុជទឹកទៅកាន់ប្រទេសអូស្ត្រាលី។