អគ្គលេខាធិការសម្ព័ន្ធអារ៉ាប់ (AL) លោក Ahmed Aboul-Gheit បានថ្លែងកាលពីថ្ងៃពុធថា ការសម្រេចចិត្តរួមគ្នាដោយប្រទេសលោកខាងលិចចំនួន ៥ ក្នុងការដាក់ទណ្ឌកម្មរដ្ឋមន្ត្រីអ៊ីស្រាអែលពីររូប ត្រូវបាន «ស្វាគមន៍» ។

សេចក្តីថ្លែងការណ៍រួមរបស់រដ្ឋមន្ត្រីការបរទេសនៃប្រទេសទាំង៥ បានឲ្យដឹងកាលពីថ្ងៃអង្គារថា រដ្ឋមន្ត្រីសន្តិសុខអ៊ីស្រាអែលលោក Itamar Ben-Gvir និងរដ្ឋមន្ត្រីហិរញ្ញវត្ថុលោក Bezalel Smotrich ត្រូវបានហាមឃាត់ការធ្វើដំណើរដោយប្រទេសអូស្ត្រាលី កាណាដា នូវែលសេឡង់ ន័រវែស និងចក្រភពអង់គ្លេស ជុំវិញ ការញុះញង់ឲ្យមានអំពើហិង្សាម្តងហើយម្តងទៀតទៅលើប្រជាជនប៉ាឡេស្ទីន នៅតំបន់វេសបែង(West Bank)។

យោងតាមសេចក្តីថ្លែងការណ៍របស់សម្ព័ន្ធអារ៉ាប់ (AL) ដែលបានចេញផ្សាយកាលពីថ្ងៃពុធ លោក Aboul-Gheit បានពណ៌នាការហាមប្រាមនេះថា ពិតជា «សំខាន់ណាស់» ក្នុងការធ្វើឲ្យមន្ត្រីក្នុងរដ្ឋាភិបាលនៃប្រទេសដែលកំពុងគ្រប់គ្រងនេះ ទទួលខុសត្រូវចំពោះការពាក់ព័ន្ធក្នុង «ការញុះញង់ជាក់ស្តែងនូវអំពើហិង្សា»និងបណ្តោយឲ្យអ្នកតាំងលំនៅអ៊ីស្រាអែល ដែលបានវាយប្រហារជនជាតិប៉ាឡេស្ទីន នៅតំបន់វេសបែង រួចពីទោសទណ្ឌ។

លោកបាននិយាយថា ការដាក់ទណ្ឌកម្មនេះ លាតត្រដាងពីអំពើឧក្រិដ្ឋកម្មរបស់មន្ត្រីរដ្ឋាភិបាលស្តាំនិយមជ្រុល ដែលបានប្រព្រឹត្តឧក្រិដ្ឋកម្មសង្រ្គាម និងការរំលោភយ៉ាងទូលំទូលាយលើច្បាប់មនុស្សធម៌អន្តរជាតិ ទាំងនៅតំបន់វេសបែង និងហ្កាហ្សាស្ទ្រីប។

សេចក្តីថ្លែងការណ៍ បានបញ្ជាក់ថា ចំណាច់ការនេះ គឺជាជំហានដ៏សំខាន់មួយឆ្ពោះទៅរកតុល្យភាពឡើងវិញនូវគោលជំហរអន្តរជាតិស្តីពីឧក្រិដ្ឋកម្មសង្គ្រាមប្រឆាំងនឹងប៉ាឡេស្ទីន និងចាត់វិធានការជាក់ស្តែង ដើម្បីឲ្យជនល្មើស ទទួលខុសត្រូវ។