បាល់ទាត់៖ ក្រោយបញ្ចប់រដូវកាលឆ្នាំ២០២១ ក្លិបព្រះខ័នរាជសា្វយរៀងបាននាំចូលកីឡាករចំណូលថ្មីដំបូង ដើម្បីត្រៀមរដូវកាលថ្មីឆ្នាំ២០២២ ខាងមុខគឺខ្សែប្រយុទ្ធ ឡុង ភារ៉ាត ដែលផ្ទេរមកពីក្លិបអង្គរថាយហ្គឺរ។ បច្ចុប្បន្ន ភារ៉ាត មានវ័យ ២៣ឆ្នាំ។ មុនផ្ទេរទៅកាន់ទឹកដីខេត្តស្វាយរៀង អតីតយុវជនថ្នាលក្លិបភ្នំពេញក្រោនរូបនេះធ្លាប់បានប្រកបអាជីពជាមួយក្លិបមួយចំនួន រួមមានអតីតក្លិបវេស្ទើនភ្នំពេញឆ្នាំ២០១៦-២០១៧ តែក្រោយក្លិបមានមូលដ្ឋាននៅភ្នំពេញនេះប្រកាសរំសាយ រូបគេក៏បានផ្ទេរទៅលេងឲ្យក្លិបសូលទីឡូអង្គរនៅឆ្នាំ២០១៨។
បន្ទាប់ពីប្រកបអាជីពបាន ១រដូវកាលលើទឹកដីអង្គរ កីឡាករមានដើមកំណើតពីខេត្តព្រះសីហនុនេះក៏បន្ដផ្ទេរទៅលេងឲ្យក្លិបមានមូលដ្ឋាននៅខេត្តសៀមរាមមួយទៀត គឺក្លិបអង្គរថាយហ្គឺរចាប់ពីឆ្នាំ២០១៩ រហូតដល់ចប់រដូវកាលឆ្នាំ២០២១ កន្លងទៅ ដោយគេបានរួមចំណែកយ៉ាងសំខាន់ក្នុងការជួយក្រុម ទោះបីអង្គរថាយហ្គឺរពុំទទួលបានលទ្ធផលសមប្រកបក៏ដោយ។ ដូច្នេះក្លិបព្រះខ័នរាជស្វាយរៀងគឺជាក្លិបអាជីពទី៤ នៃក្របខណ្ឌលីគកំពូលកម្ពុជា ដែល ឡុង ភារ៉ាត ត្រូវប្រកបអាជីព និងទទួលយកនូវបទពិសោធន៍ក្រោមការដឹកនាំរបស់គ្រូបង្វឹកលោក Conor Nestor ដើម្បីត្រៀមការប្រកួតនារដូវកាលថ្មីខាងមុខ។ គួរដឹងថា ក្រៅពីបទពិសោធន៍លេងឲ្យក្លិបអាជីព ឡុង ភារ៉ាត ក៏ធ្លាប់ជាប់ក្រុមជម្រើសជាតិអាយុក្រោម ១៦ឆ្នាំ, ១៧ឆ្នាំ, ១៨ឆ្នាំ, ១៩ឆ្នាំ រហូតដល់ជាប់ជម្រើសជាតិអាយុក្រោម ២២ឆ្នាំជំនាន់លោក Felix G.Dalmas ដើម្បីចូលរួមការប្រកួតពានរង្វាន់ AFF U22 Championship 2019 ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
