រដ្ឋមន្ត្រីការបរទេសបារាំង បាននិយាយកាលពីថ្ងៃពុធថា នៅចុងសប្តាហ៍នេះ អ៊ីស្រាអែលនឹងបណ្តេញចេញនូវជនជាតិបារាំង៤ នាក់ ដែលត្រូវបានឃុំខ្លួន បន្ទាប់ពីកងកម្លាំងសន្តិសុខ បានស្ទាក់ចាប់ទូកផ្តល់ជំនួយរបស់ពួកគេដែលមានទិសដៅទៅកាន់តំបន់ហ្កាហ្សា។ 

ការប្រកាសនេះ បានធ្វើឡើង នៅពេលដែលនាយករដ្ឋមន្ត្រីរបស់ប្រទេសបារាំង បានចោទប្រកាន់សកម្មជននៅលើទូកដែលសង្ឃឹមថា នឹងលើកកម្ពស់ការយល់ដឹងអំពីស្ថានភាពមនុស្សធម៌ នៅក្នុងតំបន់ហ្កាហ្សាដែលហែកហួរដោយសង្រ្គាមនេះ ថាបានប្រើប្រាស់ជម្លោះអ៊ីស្រាអែលនិងប៉ាឡេស្ទីន ដើម្បីកេងចំណេញ ផ្នែកនយោបាយ។

រដ្ឋមន្ត្រីការបរទេសបារាំងលោក Jean-Noel Barrot បាននិយាយនៅលើសង្គម Xថា សកម្មជនទាំង ៤នាក់ ក្នុងនោះមានអ្នកស្រី Rima Hassan សមាជិកសភាអឺរ៉ុបមកពីគណបក្ស France Unbowed (LFI) ដែលមានដើមកំណើតប៉ាឡេស្ទីន នឹងត្រូវនិរទេស នៅថ្ងៃព្រហស្បតិ៍នេះ និងថ្ងៃសុក្រ។ 

ពួកគេស្ថិតក្នុងចំណោមមនុស្ស ១២នាក់ នៅលើទូកក្ដោង Madleen ដែលដឹកស្បៀងអាហារ និងសម្ភារៈ ផ្គត់ផ្គង់សម្រាប់តំបន់ហ្កាហ្សា មុនពេលវាត្រូវបានស្ទាក់ចាប់ដោយកងកម្លាំងអ៊ីស្រាអែល នៅក្នុងដែនទឹកអន្តរជាតិ ចេញពីទឹកដីប៉ាឡេស្ទីនដែលត្រូវបានឡោមព័ទ្ធ កាលពីថ្ងៃចន្ទ។

អ្នកទាំង ៤នាក់ ក្នុងនោះមានពលរដ្ឋបារាំងពីរនាក់ និងសកម្មជនស៊ុយអែត Greta Thunberg បានយល់ព្រមឲ្យគេនិរទេសភ្លាមៗ។

ចំណែក ៨នាក់ដែលនៅសល់ ត្រូវបានឃុំខ្លួន បន្ទាប់ពីពួកគេបានបដិសេធមិនចាកចេញពីអ៊ីស្រាអែលដោយស្ម័គ្រចិត្ត។ នេះបើយោងតាមអង្គការ Adalah ដែលជាអង្គការសិទ្ធិមនុស្សអ៊ីស្រាអែលតំណាងឲ្យ សកម្មជនភាគច្រើន។

គួរបញ្ជាក់ផងដែរ សកម្មជនទាំង ១២នាក់ ត្រូវបានហាមឃាត់មិនឲ្យចូលប្រទេសអ៊ីស្រាអែល រយៈពេល ១០០ឆ្នាំ។