កងកម្លាំងប្រដាប់អាវុធហ្ស៊កដានីកាលពីថ្ងៃពុធ បានជម្លៀសកុមារ ១៦នាក់ ពីតំបន់ហ្កាហ្សាស្ទ្រីប ទៅកាន់មន្ទីរពេទ្យនៅក្នុងប្រទេសនេះសម្រាប់ការព្យាបាល រួមទាំងអ្នកជំងឺមហារីក១០នាក់។ នេះបើយោងតាមសេចក្តីថ្លែងការណ៍របស់យោធា។

កុមារទាំងនោះ ត្រូវបានអមដំណើរដោយសមាជិកគ្រួសារ ៤៨នាក់ ដែលជាផ្នែកមួយនៃក្រុមថ្មីមួយ ក្រោមគំនិតផ្តួចផ្តើមច្រករបៀងពេទ្យហ្ស៊កដានី។

សេចក្តីថ្លែងការណ៍ បានបញ្ជាក់ថា កុមារ ៤នាក់ ត្រូវបានដឹកតាមឧទ្ធម្ភាគចក្ររបស់កងទ័ពអាកាសហ្ស៊ដានី ទៅកាន់អាកាសយានដ្ឋាន Marka Military Airport ក្នុងទីក្រុងអាម៉ាន (Amman) ជាមួយនឹងក្រុមគ្រូពេទ្យឯកទេស នៅលើឧទ្ធម្ភាគចក្ររយន្តនោះ។

ចំណែក កុមារ ១២នាក់ទៀត ត្រូវបានគេដឹកតាមរថយន្តសង្គ្រោះ ឆ្លងកាត់ស្ពាន King Hussein     Bridge ។

កុមារម្នាក់ នឹងត្រូវបានបញ្ជូនទៅប្រទេសអារ៉ាប៊ីសាអ៊ូឌីត និងម្នាក់ទៀត ទៅប្រទេសអារ៉ាប់រួម ដើម្បីព្យាបាលបន្ថែម។

ការជម្លៀសនេះ ត្រូវបានធ្វើឡើង ក្នុងការសម្របសម្រួលជាមួយក្រសួងសុខាភិបាលហ្ស៊កដានី និងអង្គការសុខភាពពិភពលោក។

ក្នុងអំឡុងពេលទស្សនកិច្ចនៅសហរដ្ឋអាមេរិក កាលពីខែកុម្ភៈ មហាក្សត្រហ្ស៊កដានី Abdullah II បានប្រកាសពីការត្រៀមខ្លួនរបស់ប្រទេសរបស់ព្រះអង្គ ក្នុងការទទួលកុមារប៉ាឡេស្ទីនរហូតដល់ ២.000នាក់សម្រាប់ការថែទាំសុខភាព។